வடகொரியா ஜனாதிபதி கிம் ஜோங் உன் உயிரிழந்துவிட்டதாகவும், அவர் கோமா நிலையில் இருந்ததாகவும் சமூக வலைத்தளங்களில் பரவிய தகவல்களுக்கு மத்தியில், அவர் பொதுநிகழ்வில் பங்கேற்ற புகைப்படங்களை வடகொரிய அரச ஊடகங்கள் வெளியிட்டுள்ளன. இதன் மூலம் அவரது உடல்நிலை மற்றும் ஆட்சி மாற்றம் தொடர்பாகப் பரவிய வதந்திகள் மீண்டும் கேள்விக்குள்ளாகியுள்ளன.
வடகொரியாவின் அதிகாரபூர்வ ஊடகமான கொரிய மத்திய செய்தி நிறுவனம் (KCNA) வெளியிட்டுள்ள புகைப்படங்களில், கிம் ஜோங் உன் ஆடை மற்றும் காலணி கண்காட்சியொன்றைப் பார்வையிடுவதைக் காண முடிகிறது.
குழந்தைகளுக்கான காலணிகள் மற்றும் பெண்களுக்கான ஆடைகளை அவர் பார்வையிடுவதுடன், அதிகாரிகளுடன் கலந்துரையாடும் காட்சிகளும் புகைப்படங்களில் இடம்பெற்றுள்ளன.
கடந்த திங்கட்கிழமை நடைபெற்றதாகத் தெரிவிக்கப்படும் இந்த நிகழ்வில், அவரது மகள் கிம் ஜு ஏ மற்றும் மனைவி ரி சோல் ஜு ஆகியோரும் பங்கேற்றதாகச் செய்திகள் தெரிவிக்கின்றன. எனினும், வெளியிடப்பட்ட புகைப்படங்களின் உண்மைத்தன்மையைச் சுயாதீனமாக உறுதிப்படுத்த முடியவில்லை எனவும் தெரிவிக்கப்பட்டுள்ளது.
எவ்வாறு பரவின உயிரிழப்பு வதந்திகள்?
அமெரிக்காவில் வசிக்கும் சீன அரசியல் எதிர்ப்பாளரான வான்ஜுன் ஷியே என்பவர் சமூக வலைத்தளமான எக்ஸ் (X) தளத்தில் வெளியிட்ட பதிவுகளைத் தொடர்ந்து இந்த வதந்திகள் பரவியதாகத் தெரிவிக்கப்படுகிறது.
கிம் ஜோங் உன்னுக்கு மூளையில் இரத்தக்கசிவு ஏற்பட்டு, அவர் கோமா நிலைக்குச் சென்றதாகவும், அவசர சிகிச்சைக்காக சீனாவின் பெய்ஜிங்கிற்கு அழைத்துச் செல்லப்பட்டதாகவும் அந்தப் பதிவுகளில் கூறப்பட்டிருந்தது.
மேலும், அவர் உயிரிழந்துவிட்டதாகவும், அவரது சகோதரி கிம் யோ ஜோங் நாட்டின் ஆட்சிப் பொறுப்பைக் கைப்பற்றியுள்ளதாகவும் தகவல்கள் பரப்பப்பட்டன. வடகொரியாவின் தலைமைத்துவ மாற்றத்தைச் சமாளிப்பதற்காக சீனா சுமார் 9,000 படையினரைப் பியோங்யாங்கிற்கு அனுப்பியதாகவும் குற்றச்சாட்டுகள் முன்வைக்கப்பட்டன.
எனினும், இந்தக் கூற்றுகளை உறுதிப்படுத்தும் மருத்துவ ஆவணங்களோ, நம்பகமான நேரடிச் சாட்சியங்களோ அல்லது சுயாதீனமாகச் சரிபார்க்கக்கூடிய ஆதாரங்களோ இதுவரை முன்வைக்கப்படவில்லை.
