வலுசக்தி அமைச்சர் உதய கம்மன்பிலவுக்கு எதிரான நம்பிக்கையில்லாப் பிரேரணை தொடர்பில் 2ஆவது பெரிய எதிர்க்கட்சியான தமிழ்த் தேசியக் கூட்டமைப்புடன் கலந்துரையாடப்படவில்லை. அவ்வாறு கலந்துரையாடியிருந்தால் வலுவானதொரு பிரேரணையை முன்வைத்திருக்கலாம் – என்று தமிழ்த் தேசியக் கூட்டமைப்பின் வன்னி மாவட்ட நாடாளுமன்ற உறுப்பினர் வினோநோதராதலிங்கம் தெரிவித்தார்.
நாடாளுமன்றத்தில் நேற்று நடைபெற்ற நம்பிக்கையில்லாப் பிரேரணைமீதான விவாதத்தில் கலந்துகொண்டு கருத்து வெளியிடுகையிலேயே அவர் இவ்வாறு கூறினார். இது தொடர்பில் அவர் மேலும் கூறியவை வருமாறு,
“ இந்த அரசின் ஒவ்வொரு நடவடிக்கைக்கு எதிராகவும் மக்கள் போராடும் நிலை இன்று காணப்படுகின்றது. எரிபொருட்களின் விலை அதிகரிப்பால் மீனவர்கள், விவசாயிகள் உட்பட நாட்டில் அனைத்து தரப்பினரும் பாதிக்கப்பட்டுள்ளனர். இதனால் நம்பிக்கையில்லாப் பிரேரணையை ஆதரிப்போம்.
நாடாளுமன்றத்திலுள்ள 2ஆவது பெரிய எதிர்க்கட்சியான எங்களுடனும், ஜே.வி.பியினருடனும் பிரதான எதிர்க்கட்சி இவ்விடயம் தொடர்பில் ஆலோசனை நடத்தியிருக்க வேண்டும். தனி அமைச்சருக்கு எதிராக அல்லாமல் ஒட்டு மொத்த அரசுக்கு எதிராகவும் வலுவானதொரு பிரேரணையை முன்வைத்திருக்கலாம்.
சிறுபான்மையின மக்களை ஒடுக்குவதற்காக மிக கொடூரமான பயங்கரவாத தடைச்சட்டம் கொண்டுவரப்பட்டு 42 ஆண்டுகளாகின்றன. இந்த நாள் கரிநாளாகும். பயங்கரவாத தடைச்சட்டம் நீக்கப்பட வேண்டும் என்பதே எமது நிலைப்பாடு. ஐ.நா. மனித உரிமைகள் பேரவை உட்பட சர்வதேச சமூகமும் இதனைதான் வலியுறுத்துகின்றன. இந்நிலையில் சர்வதேச சமூகத்தை சமாளிப்பதற்காக சில திருத்தங்களை மேற்கொள்வதற்கு அரசு முற்படுகின்றது. அவ்வாறு அல்ல அச்சட்டம் முழுமையாக நீக்கப்பட வேண்டும்.” – என்றார்.
