சபைனா பார்க்கில் நடைபெற்ற பகலிரவு டெஸ்ட் போட்டியான தொடரின் கடைசி டெஸ்ட் போட்டியில் ஆஸ்திரேலிய அணி, மேற்கு இந்தியத் தீவுகளை 27 ஓட்டங்களுக்குள் சுருட்டி சாதனை வெற்றி பெற்றது. 

ஆஸ்திரேலியாவில் பூர்வக்குடி இனத்தில் இருந்து தேசிய அணியில் இடம்பிடித்துள்ள ஸ்காட் போலண்ட், இப்போட்டியில் சாதனை படைத்தார். 

ஆஸ்திரேலிய கிரிக்கெட் அணி மேற்கு இந்தியத் தீவுகளில் சுற்றுப்பயணம் மேற்கொண்டு 3 போட்டிகள் கொண்ட டெஸ்ட் தொடரில் விளையாடியது.  

இதில் மூன்றாவது மற்றும் கடைசி டெஸ்ட் போட்டி கடந்த 12-ம் திகதி தொடங்கியது. பகலிரவு போட்டியாக நடைபெற்ற இந்த ஆட்டத்தில் முதல் இன்னிங்ஸில் ஆஸ்திரேலியா 225 ஓட்டங்கள், மேற்கு இந்தியத் தீவுகள் 143 ஓட்டங்கள் எடுத்தன. 

இரண்டாவது இன்னிங்ஸில் ஆஸ்திரேலியா 121 ஓட்டங்களுக்குள் ஆல் அவுட் ஆனது. 204 ஓட்டங்கள் என்ற இலக்கை விரட்டியது மேற்கு இந்தியத் தீவுகள் அணி. 

இதில் ஆஸ்திரேலிய பூர்வக்குடி பந்துவீச்சாளர் ஸ்காட் போலண்ட் ஹாட்ரிக் சாதனை நிகழ்த்த , மிட்செல் ஸ்டார்க் முதல் 15 பந்துகளில் 5 விக்கெட்டுகளைக் கைப்பற்றி உலக சாதனை நிகழ்த்தினார். தொடரை ஆஸ்திரேலியா முற்றிலும் வென்று 3-0 என்று கைப்பற்றியது.

இதோடு தனது 400-வது டெஸ்ட் விக்கெட்டையும் கைப்பற்றினார் மிட்செல் ஸ்டார்க். 100 டெஸ்ட் போட்டிகளில் விளையாடி 402 விக்கெட்டுகளைக் கைப்பற்றியுள்ளார் மிட்செல் ஸ்டார்க். அதோடு இந்த இன்னிங்ஸில் 9 ஓட்டங்களுக்கு 6 விக்கெட்டுகளைக் கைப்பற்றி தன் சிறந்த டெஸ்ட் பந்து வீச்சை அவர் வீசினார். 

ஆஸ்திரேலிய பூர்வக்குடி பந்துவீச்சாளர் ஸ்காட் போலண்ட் ஜஸ்டீன் கிரீவ்ஸ், ஷமார் ஜோசப், ஜோமல் வாரிக்கன் ஆகியோர் விக்கெட்டை வீழ்த்தி ஹாட்ரிக் சாதனை நிகழ்த்தினார். 
வெற்றி இலக்கான 204 ஓட்டங்களை எதிர்த்து ஆடிய மே.இ.தீவுகள் 27 ஓட்டங்களுக்குள் சுருண்டது. 

1955-ம் ஆண்டில் நியூஸிலாந்து அணி ஆக்லாந்தில் இங்கிலாந்துக்கு எதிராக 26 ஓட்டங்களுக்குள் சுருண்ட பிறகு ஆகக்குறைந்த டெஸ்ட் ஸ்கோரை எடுத்து மே.இ.தீவுகள் எதிர்மறைச் சாதனை புரிந்துள்ளது.