Apple , Meta , Google உள்ளிட்ட உலகின் முன்னணி தொழில்நுட்ப நிறுவனங்கள், சிறார்கள்மீதான பாலியல் வன்கொடுமைகள் மற்றும் ஆன்லைன் பாலியல் மிரட்டல்களைத் (online sexual extortion) தடுப்பதில் பெரிய குறைபாடுகளைக் கொண்டுள்ளதாக ஆஸ்திரேலியாவின் இணைய ஒழுங்குமுறை அமைப்பான eSafety செவ்வாய்க்கிழமையன்று தெரிவித்துள்ளது.
பாலியல் மிரட்டல் விடுபவர்கள் பயன்படுத்தும் பொதுவான மிரட்டல் உத்திகளையும் உரையாடல் வடிவங்களையும் (coercive scripts) கண்டறியக்கூடிய தொழில்நுட்பங்கள் பயன்பாட்டில் இருந்தும், ஆன்லைன் தளங்கள் அவற்றை முறையாகப் பயன்படுத்துவதில்லை என்று eSafety தனது வெளிப்படைத்தன்மை அறிக்கையில் சாடியுள்ளது.
"கிரிமினல்கள் தங்களது சேவைகளை எப்படியெல்லாம் ஆக்கிரமித்து பேரழிவை ஏற்படுத்துகிறார்கள் என்பதற்கான ஆதாரங்களையும், அதைத் தடுப்பதற்கான தெளிவான வழிகாட்டுதல்களையும் இந்த நிறுவனங்களுக்கு நாங்கள் வழங்கியுள்ளோம்.
ஆனால், அதற்கான தொழில்நுட்பங்கள் எளிதாகக் கிடைத்த பிறகும், அவர்களிடம் இருந்து போதுமான நடவடிக்கைகள் இன்னும் எடுக்கப்படவில்லை." என்று eSafety ஆணையர் ஜூலி இன்மேன் கிராண்ட் தெரிவித்துள்ளார்.
மிரட்டல் முறை: பாதிக்கப்பட்டவர்களின் அந்தரங்கப் படங்களை அல்லது வீடியோக்களைப் பொதுவெளியில் பகிர்ந்துவிடுவோம் என்று மிரட்டி, அவர்களைத் தங்களுக்குக் கட்டுப்பட வைக்கும் ஆன்லைன் மிரட்டல் வடிவமே இதுவாகும்.
2025 ஜூலை முதல் டிசம்பர் வரையிலான காலத்தில், eSafety அமைப்புக்கு 2,000-க்கும் மேற்பட்ட பாலியல் மிரட்டல் புகார்கள் வந்துள்ளன. இதில் 18 முதல் 24 வயதுக்குட்பட்ட இளைஞர்களே அதிகம் பாதிக்கப்பட்டுள்ளனர்.
பதின்ம வயதுப் பாதிப்பு: கடந்த ஆண்டு நடத்தப்பட்ட ஆய்வில், 16-18 வயதுக்குட்பட்ட பதின்ம வயதினரில் 10-ல் ஒருவர் பாலியல் மிரட்டலுக்கு ஆளாகியிருப்பதும், அவர்களில் பாதிக்கும் மேற்பட்டோர் 16 வயதை எட்டுவதற்கு முன்பே இலக்காக்கப்பட்டதும் தெரியவந்துள்ளது.
தொழில்நுட்பப் பற்றாக்குறை: பாலியல் குற்றவாளிகள் பயன்படுத்தும் மொழியைக் கண்டறியும் 'மொழி பகுப்பாய்வு' (language analysis) போன்ற எளிய தொழில்நுட்பங்களை நிறுவனங்கள் பயன்படுத்துவதில்லை.
நேரடி ஒளிபரப்பு (Livestreaming): குழந்தைகள் மீதான பாலியல் வன்கொடுமைகள் நேரடி ஒளிபரப்பு செய்யப்படுவதைக் கண்டறியும் தொழில்நுட்பங்கள் இருந்தும், அவை தொடர்ந்து பயன்படுத்தப்படுவதில்லை.
இந்தக் குறைபாடுகளுக்கு மத்தியிலும், சில நிறுவனங்கள் எடுத்துள்ள நல்ல முயற்சிகளையும் இந்த அறிக்கை சுட்டிக்காட்டியுள்ளது.
கூகுள் & ஸ்னாப் (Snap): அறியப்பட்ட குழந்தை பாலியல் வன்கொடுமைப் பொருட்களை (CSAM) முன்கூட்டியே கண்டறிய நடவடிக்கை எடுத்துள்ளன.
டிஸ்கார்ட்: வன்கொடுமைப் பதிவுகளுக்கான லிங்குகளை (Links) முடக்கியுள்ளது.
மெட்டா: குழந்தைகளைக் கவர்ந்திழுக்கும் குற்றவாளிகளை (grooming) கண்டறிய புதிய கருவிகளைப் பயன்படுத்துகிறது.
மைக்ரோசாஃப்ட் (Microsoft): வீடியோ கால்களில் நடக்கும் நேரடி வன்கொடுமைகளைக் கண்டறியும் தொழில்நுட்பத்தைச் செயல்படுத்தியுள்ளது.
16 வயதுக்குட்பட்டவர்கள் சமூக ஊடகங்களைப் பயன்படுத்துவதைத் தடை செய்யும் சட்டத்தை ஆஸ்திரேலியா அண்மையில் கொண்டுவந்தது.
இத்தடையை மீறும் தொழில்நுட்ப நிறுவனங்கள் மீது நீதிமன்ற நடவடிக்கை எடுக்க இ-சேப்டி அமைப்பிற்கு கூடுதல் அதிகாரங்களை வழங்கும் சட்டவரைவை கடந்த ஜூன் மாதம் ஆஸ்திரேலிய அரசு அறிமுகப்படுத்தியது குறிப்பிடத்தக்கது.
