லிபரல் கட்சியின் வேட்பாளர் பட்டியலில் மொய்ரா டீமிங்கிற்கு (Moira Deeming) பதிலாக , மெல்போர்னின் பிரதி மேயரான ரோஷேனா கேம்ப்பெல் (Roshena Campbell), விக்டோரிய நாடாளுமன்றத்தில் இடம் பிடிப்பது ஏறக்குறைய உறுதியாகியுள்ளது.

சட்டத்தரணியான  கேம்ப்பெல், வரும் நவம்பர் மாதம் நடைபெறவுள்ள மேலவைத் தேர்தலில் 'வெஸ்டர்ன் மெட்ரோபொலிட்டன்' (Western Metropolitan) பிராந்தியத்திற்கான லிபரல் கட்சியின் வேட்பாளர் பட்டியலில் முதன்மை வேட்பாளராகப் போட்டியிட, கட்சியின் மாநில நிர்வாகக் குழு நேற்றிரவு அவரைத் தேர்வு செய்தது.

நாடாளுமன்றத்தில்  உள்ள மூத்த லிபரல் கட்சி உறுப்பினர்களின் ஆதரவைப் பெற்றிருந்த தற்போதைய  நாடாளுமன்ற உறுப்பினர் ட்ரங் லூவை (Trung Luu) தோற்கடித்து அவர் இந்த வாய்ப்பைப் பெற்றுள்ளார்.

இதனால், வேட்பாளர் பட்டியலில் இரண்டாவது இடத்திற்கு  லூ மீண்டும் விண்ணப்பிக்க வேண்டும். இந்த இரண்டாவது இடம் பொதுவாக வெற்றி பெறக்கூடிய ஒன்றாகக் கருதப்பட்டாலும், ஒன் நேஷன் (One Nation) கட்சியால் இதற்கு கடும் சவால் எழக்கூடும்.

கேம்ப்பெல் குறுகிய காலத்தில் கட்சியின் முன்வரிசை தலைவராக (frontbench) வரக்கூடிய திறமை வாய்ந்தவராகக் கருதப்படுகிறார். இருப்பினும், பூட்ஸ்ரே (Footscray) முதல் சன்பரி (Sunbury) மற்றும் வெரிபி (Werribee) வரை உள்ள இந்தத் தேர்தல் தொகுதியில் அவர் வசிக்கவில்லை என்பது குறிப்பிடத்தக்கது.

இவர் முன்னதாக 2023 ஆஸ்டன் (Aston) இடைத்தேர்தலில் போட்டியிட்டார். ஆனால், எதிர்பாராதவிதமாக அத்தொகுதியில் கூட்டாட்சி லிபரல் கட்சி தோல்வியடைந்தது. இது பிரதமர் அந்தோணி அல்பனீஸுக்கு ஒரு வரலாற்றுச் சிறப்புமிக்க வெற்றியாக அமைந்தது. 

மொய்ரா டீமிங்கின் வேட்பாளர் தேர்வை ஏகமனதாக ரத்து செய்ததைத் தொடர்ந்து, வெஸ்டர்ன் மெட்ரோபொலிட்டன் பிராந்திய வேட்பாளர்களுக்கான போட்டியை மீண்டும் திறக்க லிபரல் கட்சி கட்டாயப்படுத்தப்பட்டது.