வோகா (Wagga Wagga) தொகுதி முன்னாள் நாடாளுமன்ற உறுப்பினர் டேரில் மெக்யுயருடன் (Daryl Maguire) இணைந்து போலி விசா மோசடியில் ஈடுபட்ட பெண்ணுக்குச் சிறைத்தண்டனை விதிக்கப்பட்டபோதிலும், அவர் சிறைக்குச் செல்வதிலிருந்து விலக்கு அளிக்கப்பட்டுள்ளது.

மெக்கி நிங் லோகன் (Maggie Ning Logan) அல்லது மேகி வாங் (Maggie Wang) என்று அழைக்கப்படும் 57 வயதான அந்தப் பெண்ணுக்கு, குற்றச்சாட்டுகள் தொடர்பாக இரண்டு ஆண்டுகள் 10 மாதங்கள் சிறைத்தண்டனையும் 240 மணிநேரச் சமூகச் சேவையும் விதித்து நியூ சவுத் வேல்ஸ் (NSW) மாவட்ட நீதிமன்றம் வெள்ளிக்கிழமை தீர்ப்பளித்தது.

இருப்பினும், நீதிபதி பிராங்க் வெல்ட்ரோ (Frank Veltro) வழங்கிய தீர்ப்பில், இத்தண்டனையைச் சமூகத்தின் மத்தியிலேயே (சமூக சேவை உத்தரவின் கீழ்) அனுபவிக்க அனுமதி அளித்தார். இதனால் லோகன் சிறைக்கம்பிகளுக்குப் பின்னால் செல்ல வேண்டிய நிலை தவிர்க்கப்பட்டுள்ளது.

வழக்கின் பின்னணி 

குடியேற்ற முகவரான மோனிகா ஹாவ் (Monica Hao) என்பவருடன் இணைந்து, தவறான மற்றும் தவறாக வழிநடத்தக்கூடிய தகவல்கள் அடங்கிய 19 விசா ஆவணங்களை அரசாங்கத்திடம் சமர்ப்பிக்க லோகன் உதவியதாக நீதிபதி தெரிவித்தார்.

கடந்த மாதம் குற்றவாளியாக அறிவிக்கப்பட்ட முன்னாள் நாடாளுமன்ற உறுப்பினர் மெக்யுயரை, 2012 ஆம் ஆண்டு நியூ சவுத் வேல்ஸ் நாடாளுமன்றத்தின் ஆசிய பசிபிக் நட்புறவுக் குழுவின் மூலமாக லோகன் முதன்முதலில் சந்தித்துள்ளார்.

முந்தைய விசாரணையின் போது நீதிமன்றத்தில் வாசிக்கப்பட்ட கடிதம் ஒன்றில், இக்குற்றங்கள் நடந்த காலகட்டத்தில் தான் மனதளவில் மிகவும் பலவீனமாக இருந்ததாக லோகன் குறிப்பிட்டிருந்தார். 2010 இல் தனது முன்னாள் கணவர் வாகன விபத்தில் உயிரிழந்ததால் ஏற்பட்ட அதிர்ச்சியும், காவல் துறையில் பணியாற்றியபோது ஏற்பட்ட பணிச்சுமையுமே இதற்குக் காரணம் என அவர் தெரிவித்துள்ளார்.

"மெக்யுயர் என்னைப் பாராட்டி நாடாளுமன்றத்திற்கு உணவருந்த அழைத்தபோது, நான் முக்கியமான ஒரு நபராக உணர்ந்தேன். அவரை மகிழ்விக்கவே விரும்பினேன், ஏமாற்ற விரும்பவில்லை" என்று லோகன் அக்கடிதத்தில் குறிப்பிட்டுள்ளார்.

சீனக் குடிமக்களுக்குப் போலியாகப் பணி விசா வழங்குவதற்காக உள்ளூர் வணிக நிறுவனங்களுடன் தொடர்புகொள்வதே லோகனின் வேலையாக இருந்துள்ளது. இந்த மோசடி மூலம் அவர் 60,000 முதல் 80,000 ஆஸ்திரேலிய டாலர்கள் வரை பெற்றதாகவும், வெற்றிகரமாகச் சமர்ப்பிக்கப்பட்ட ஒவ்வொரு விண்ணப்பத்திற்கும் 5,000 டாலர் ரொக்கமாகப் பெற்றதாகவும் நீதிமன்றத்தில் தெரிவிக்கப்பட்டது.

நீதிமன்றத்தின் முடிவு 

2002 ஆம் ஆண்டு சீனாவிலிருந்து ஆஸ்திரேலியாவிற்குக் குடிபெயர்ந்த லோகன், உயிரி மருத்துவ ஆராய்ச்சி மற்றும் கணக்கியல் ஆகிய துறைகளில் பட்டங்களைப் பெற்றவர். 

மன உளைச்சல் (PTSD) மற்றும் தீவிர மன அழுத்தத்தால் பாதிக்கப்பட்டிருந்ததே அவரது இக்குற்றப் பின்னணிக்கு ஒரு காரணமாக அமைந்தது என்பதை ஏற்றுக்கொண்ட நீதிபதி, அதேவேளையில் போலி ஆவணங்களைச் சமர்ப்பிப்பது நாட்டின் விசா அமைப்பின் நம்பிக்கையைக் குலைக்கும் தீவிரமான குற்றம் என்பதையும் சுட்டிக்காட்டினார்.

இருப்பினும், இந்த மோசடித் திட்டத்தை லோகன் உருவாக்கவில்லை என்றும், முதன்மைக் குற்றவாளிகளான மெக்யுயர் மற்றும் ஆஸ்திரேலியாவை விட்டு வெளியேறிய மோனிகா ஹாவ் ஆகியோரை விட லோகனின் குற்றப் பங்கு குறைவானதே என்றும் நீதிபதி கருதினார்.

மேலும், லோகன் தனது தவறுக்காக உண்மையான மனவருத்தத்தை வெளிப்படுத்தியுள்ளார் என்றும், தனது பழக்க வழக்கங்களை மாற்றிக்கொள்வதில் கணிசமான முன்னேற்றம் அடைந்துள்ளார் என்றும் கூறிய நீதிபதி, அவரை முழு நேரச் சிறையில் அடைப்பது அவரது மனநல மீட்பைப் பாதிக்கும் என்பதால் தீவிர திருத்தல் உத்தரவின் (Intensive Corrections Order) கீழ் சமூகத்திலேயே தண்டனையை அனுபவிக்க உத்தரவிட்டார்.

இந்த மோசடி வழக்கில் முன்னாள் நாடாளுமன்ற உறுப்பினர் டேரில் மெக்யுயருக்கான தண்டனை விவரங்கள் வரும் அக்டோபர் மாதம் அறிவிக்கப்படவுள்ளன. இதனிடையே, தங்கள் தரப்பு குற்றவாளி என்ற தீர்ப்பை எதிர்த்து மேல்முறையீடு செய்யவுள்ளதாக மெக்யுயரின் வழக்கறிஞர்கள் தெரிவித்துள்ளனர்.