சிட்னியின் புறநகர்ப் பகுதியிலுள்ள கெபாப் (kebab) கடை ஒன்றில், பாதாள உலகக் குழுவைச் சேர்ந்த முக்கியப் பிரமுகர் ஒருவரைக் கொலை செய்ய முயன்ற சம்பவம் தொடர்பாக 31 வயதுடைய நபர் ஒருவரைக் காவல்துறையினர் கைது செய்துள்ளனர்.

வெள்ளிக்கிழமை மதியம் 12 மணியளவில் 'டாஸ்க்போர்ஸ் பால்கன்' (Taskforce Falcon) புலனாய்வாளர்களும் 'ராப்டார் ஸ்குவாட்' (Raptor Squad) காவல்துறையினரும் நார்வீ (Narwee) பகுதியிலுள்ள வீடு ஒன்றைச் சோதனையிட்டு அந்த நபரைக் கைது செய்தனர். அவர் கேம்ப்ஸி (Campsie) காவல் நிலையத்திற்கு அழைத்துச் செல்லப்பட்ட நிலையில், அங்கு அவர் மீது வழக்குப்பதிவு செய்யப்படும் என எதிர்பார்க்கப்படுகிறது.

2025-ஆம் ஆண்டு ஆபர்ன் (Auburn) பகுதியில் நடத்தப்பட்ட இந்தத் துப்பாக்கிச் சூட்டுச் சம்பவத்தின் இலக்கான சமீம்ஜன் அஸாரி (Samimjan Azari), தோள்பட்டையில் காயமடைந்த நிலையிலும் அதிர்ஷ்டவசமாக உயிர் தப்பினார்.

எனினும், அவரது கூட்டாளியான 25 வயது காளி தைசேனி (Kali Taiseni) முகத்தில் சுடப்பட்டார். அவர் ஆயுள் முழுவதற்கும் பாதிப்பை ஏற்படுத்தும் காயங்களுக்கு உள்ளாக நேரிடும் என காவல்துறை தெரிவித்துள்ளது. இந்த மோதலின் போது 47 வயதுடைய கடை ஊழியர் ஒருவரும் சுடப்பட்டார்.

முகமூடி அணிந்த இரண்டு துப்பாக்கிதாரிகள் சம்பவ இடத்திலிருந்து தப்பிய பிறகு, கிரேஸ்டேன்ஸ் (Greystanes) பகுதியில் எரிக்கப்பட்ட நிலையில் காணப்பட்ட ஆடி (Audi) காரை காவல்துறையினர் கண்டறிந்தனர். இது அவர்கள் தப்பிக்கப் பயன்படுத்திய காராக இருக்கலாம் என நம்பப்படுகிறது.

வல்லமைமிக்க 'அலமெடின்' (Alameddine) குற்றவியல் குடும்பத்தில் ஏற்பட்ட பிளவுக்குப் பிறகு, பாதாள உலக எதிரிகளின் முக்கிய இலக்காக மாறிய திரு. அஸாரியைக் கொலை செய்ய கூலிப்படையினர் மேற்கொண்ட நான்காவது முயற்சி இதுவாகும்.

கடந்த ஆண்டு பிப்ரவரி மாதம் பிரைட்டன்-லே-சான்ட்ஸ் (Brighton-Le-Sands) பகுதியில் துப்பாக்கிதாரி ஒருவர் திரு. அஸாரியை சுட முயன்று தவறவிட்டதே முதல் முயற்சியாகும்.

தொடர்ந்து மே மாதத்தில், கிரான்வில்லில் (Granville) முன்னாள் அலமெடின் குழு உறுப்பினர் தாவூத் ஜக்காரியாவின் (Dawood Zakaria) உயிரைப் பறித்த துப்பாக்கிச் சூட்டுச் சம்பவத்திலிருந்தும் திரு. அஸாரி தப்பினார்.

அதன்பின் ஜூன் 13 அன்று, ரோஸ்ஹில் (Rosehill) பகுதியில் கூலிப்படையினர் காத்திருந்தபோதிலும், ஒரு குண்டு கூட பாயாமல் திரு. அஸாரி தப்பித்துவிட்டார். இரண்டு நாட்களுக்குப் பிறகு, இரண்டு கூலிப்படையினர் ஆபர்னில் உள்ள கெபாப் கடைக்குள் புகுந்து இந்தத் தாக்குதலை நடத்தினர்.

அலமெடின் குழுவினர் மேற்கு சிட்னியிலிருந்து குற்றவியல் நெட்வொர்க்கை நடத்தி வருகின்றனர், இருப்பினும் இதன் முக்கியப் புள்ளிகள் லெபனானுக்குத் தப்பிச் சென்றுவிட்டனர்.

அலமெடின் குற்றவியல் நெட்வொர்க்கின் உள் மோதலால் ஏற்பட்ட வன்முறையைத் தடுப்பதற்காக, கிரான்வில்லில் மே மாதம் நடந்த துப்பாக்கிச் சூட்டுக்குப் பிறகு 'டாஸ்க்ஃபோர்ஸ் பால்கன்' உருவாக்கப்பட்டது என்பது குறிப்பிடத்தக்கது.