பல கண்டங்களில் போரினால் உயிரிழக்கும் பொதுமக்களின் எண்ணிக்கை தொடர்ந்து அதிகரித்து வரும் சூழலில், அமைதிக்கான முயற்சி என்பது மிகவும் உரத்த குரல்களைக் கொண்டவர்களின் கைகளில் மட்டுமே விட்டுவிடப்படக் கூடாது என்பதை உறுதி செய்யுமாறு ஐக்கிய நாடுகள் சபையின் 193 உறுப்பு நாடுகளுக்கும் ஆஸ்திரேலிய பிரதமர் அந்தோணி அல்பானீஸ் கோரிக்கை விடுத்துள்ளார்.
தனது அமெரிக்கப் பயணத்தின் முக்கிய நிகழ்வாக ஐக்கிய நாடுகள் பொதுச் சபையில் உரையாற்றிய அவர், "நாம் அனைவரும் அறிந்த மற்றும் பயனடைந்த பலதரப்பு சர்வதேச அமைப்பு தற்போது மிகப்பெரிய நெருக்கடிக்கு உள்ளாகியுள்ளது என்பது தெளிவாகிறது.
அமைதியைப் பாதுகாக்கவும், மனித கண்ணியமுள்ள உலகை உருவாக்கவும், ஐ.நா.வின் இலக்குகளுக்கு நியாயம் சேர்க்கவும் நாம் மாற்றங்களையும் சீர்திருத்தங்களையும் ஏற்றுக்கொள்ள வேண்டும்," என்று குறிப்பிட்டார்.
முன்னதாக இந்த வார தொடக்கத்தில், 2029 மற்றும் 2030 ஆம் ஆண்டுகளுக்கான ஐக்கிய நாடுகள் பாதுகாப்பு கவுன்சிலின் நிரந்தரமற்ற உறுப்பினர் இடத்திற்கான ஆஸ்திரேலியாவின் விருப்ப மனுவை அல்பானீஸ் முறைப்படி தொடங்கினார்.
ஐ.நா அரங்கில் உரையாற்றிய ஆஸ்திரேலிய பிரதமர்,
"ஐ.நா.வின் பணியைப் பெரு வல்லரசுகளிடமோ, மிகப்பெரிய நாடுகளிடமோ அல்லது உரத்த குரல்களிடம் மட்டுமே ஒப்படைத்துவிட முடியாது என்பதை நாம் புரிந்து கொள்ள வேண்டும்.
அதேபோல், இதை உலகின் மிகப்பெரிய பணக்கார நிறுவனங்களிடம் ஒப்பந்தம் செய்யவோ அல்லது தொழில்நுட்ப வளர்ச்சியின் வேகத்திற்கு ஏற்ப விட்டுவிடவோ முடியாது" என்றும் அல்பானீஸ் கூறினார்.
இந்த வாரம் ஐக்கிய நாடுகள் சபையில் 20-க்கும் மேற்பட்ட நாடுகள் இணைந்து செயற்கை நுண்ணறிவை (AI) சர்வதேச அளவில் முறைப்படுத்தக் கோரி கையெழுத்திட்ட கூட்டறிக்கையை முன்னோக்கி கொண்டு செல்ல அல்பானீஸ் உறுதியாக இருக்கிறார் என்பதை இது தெளிவாக உணர்த்துகிறது.
மேலும், பருவநிலை மாற்றத்தால் ஏற்படும் வாழ்வியல் அச்சுறுத்தல்கள் குறித்து சர்வதேச அளவில் விழிப்புணர்வை ஏற்படுத்த முயலும் பசிபிக் பிராந்திய கூட்டாளி நாடுகளுக்கு ஆதரவளிப்பதாக ஆஸ்திரேலியத் தலைவர் உறுதியளித்தார்.
"பாதுகாப்பு கவுன்சில் முடிவுகள் பரந்த கண்ணோட்டங்களின் அடிப்படையில் எடுக்கப்படுவதை உறுதி செய்ய, சிறிய மற்றும் நடுத்தர அளவிலான நாடுகளின் குரல்களை நாங்கள் வலுப்படுத்துவோம்" என்றும் அவர் தெரிவித்தார்.
