முன்கூட்டியே யூடியூப்பில் கசிந்த ஒலிம்பிக் லோகோவால் பரபரப்பு
2032 ஆம் ஆண்டு ஆஸ்திரேலியாவில் நடைபெறவுள்ள பிரிக்பேன் ஒலிம்பிக் மற்றும் பாராலிம்பிக் போட்டிகளுக்கான அதிகாரப்பூர்வ சின்னங்கள் (Emblems), ஒலிம்பிக் அமைப்பின் அதிகாரப்பூர்வ யூடியூப் பக்கத்திலேயே தவறுதலாக வெளியாகிப் பரபரப்பை ஏற்படுத்தியுள்ளது.
திங்கட்கிழமை அன்று அதிகாரப்பூர்வமாக வெளியிடத் திட்டமிடப்பட்டிருந்த நிலையில், ஞாயிற்றுக்கிழமை இரவே யூடியூப் பக்கத்தின் முன்னோட்டப் படம் (Preview Image) மற்றும் விளக்கத்தில் இச்சின்னம் முழுமையாகக் கசிந்தது.
'காக்கட்டூ' (Cockatoo) எனப்படும் ஆஸ்திரேலியக் கிளிப் பறவையை அடிப்படையாகக் கொண்டு இந்த லோகோ வடிவமைக்கப்பட்டுள்ளது.
'குயின்ஸ்லாந்து' மாநிலத்தின் வடிவில் அமைக்கப்பட்டுள்ள இந்த லோகோவில், ஒலிம்பிக் மற்றும் பாராலிம்பிக் சுடரைக் குறிக்கும் வகையில் கிளியின் கொண்டை வடிவமைக்கப்பட்டுள்ளது.
தகவல் கசிந்த உடனடியாக யூடியூப் பக்கத்திலிருந்து அந்தப் படம் நீக்கப்பட்டது. இது குறித்துப் பேசிய ஒலிம்பிக் துறை அமைச்சர் டிம் மாண்டர், "இந்தச் சின்னம் 2032 ஒலிம்பிக் போட்டிகள் மூலம் உலகளவில் நம்மை அடையாளப்படுத்தும். இதை நாங்கள் கொண்டாடவே விரும்புகிறோம்" என்று தெரிவித்தார்.
மேலும், இது திட்டமிட்டுச் செய்யப்பட்ட கசிவா என்ற கேள்விக்கு அவர் பதிலளிக்க மறுத்துவிட்டார். பிரிக்பேன் 2032 வர்ணனை முதன்மை அதிகாரி பிரென்ட் ஹில் கூறுகையில், "இந்தக் கசிவு போட்டிகளுக்கு மிகப்பெரிய விளம்பரத்தை ஏற்படுத்தியுள்ளது; பொதுமக்களின் வரவேற்பும் மிகவும் நேர்மறையாக உள்ளது" என்றார்.
இருப்பினும், எதிர்க்கட்சித் தலைவர் ஸ்டீவன் மைல்ஸ், இத்தகைய தவறு எவ்வாறு நடந்தது என்பது குறித்து அமைப்பாளர்கள் விசாரணை நடத்தி, எதிர்காலத்தில் இதுபோன்ற தவறுகள் நடப்பதைத் தவிர்க்க வேண்டும் எனக் கேட்டுக்கொண்டுள்ளார்.
திங்கட்கிழமை இரவு பிரிக்பேன் நகரில் நடைபெறும் பிரம்மாண்ட மக்கள் விழாவில் இந்தச் சின்னம் அதிகாரப்பூர்வமாக வெளியீடு செய்யப்படவுள்ளது.
