11 மாணவர்கள் கடத்தப்பட்டுப் படுகொலை செய்யப்பட்ட சம்பவம் தொடர்பில் முன்னாள் கடற்படைத் தளபதி கரன்னாகொட சட்டத்தின் முன் நிறுத்தப்பட வேண்டும் என்று முன்னாள் இராணுவத் தளபதி பீல்டு மார்ஷல் சரத் பொன்சேகா வலியுறுத்தினார்.
இணைய ஊடகமொன்றுக்கு வழங்கிய நேர்காணலின்போதே அவர் இவ்வாறு வலியுறுத்தினார்.
“11 மாணவர்கள் கடத்தப்பட்டுப் படுகொலை செய்யப்பட்ட சம்பவம் தொடர்பில் கரன்னாகொட (முன்னாள் கடற்படைத் தளபதி) சட்டத்தின் முன் நிறுத்தப்பட வேண்டும். இது பாரதூரமான குற்றமாகும்.
தான் திருகோணமலை முகாமுக்கு பொறுப்பாக இருந்தபோது இவர்கள் (மாணவர்கள்) அங்கு தடுத்து வைக்கப்பட்டிருந்தனர் எனச் சின்னையா (முன்னாள் கடற்படைத் தளபதி) குறிப்பிட்டிருந்தார். இதனால்தான் சின்னையாவை ஒரு மாத காலப்பகுதிக்குள்ளேயே மைத்திரிபால சிறிசேன பதவி நீக்கம் செய்தார்” என்றார் பொன்சேகா.
அதேவேளை, “நான் இராணுவத்தில் இருந்தபோது புலிகள் அமைப்பிடமிருந்து 220 கிலோ தங்கம் மீட்கப்பட்டது. ஆனால் 110 கிலோ என்றே பின்னர் பஸில் ராஜபக்ச குறிப்பிட்டிருந்தார். நான் சென்ற பிறகும் தங்கம் கிடைத்துள்ளது. அப்படியானால் புலிகளிடமிருந்து மீட்கப்பட்ட தங்கத்தில் ஒரு பகுதி கொள்ளையடிக்கப்பட்டுள்ளது” என்ற தகவலையும் பொன்சேகா வெளியிட்டார்.
