ஆஸ்திரேலியாவில் பணவீக்கத்தைக் கட்டுப்படுத்தும் நடவடிக்கை இன்னும் முடிவுக்கு வரவில்லை என   முன்னணி நான்கு பெரிய வங்கிகளில் ஒன்றான வெஸ்ட்பேக் (Westpac) எச்சரித்துள்ளது.

அதேவேளை, ஆஸ்திரேலிய மத்திய வங்கி (RBA) எதிர்வரும் செவ்வாய்க்கிழமை வட்டி விகிதத்தை அதிகரிக்கும் என எதிர்பார்க்கப்படும் நிலையில், இதனால் வேலைவாய்ப்புகளும் வர்த்தக நிறுவனங்களும் பாதிக்கப்படக்கூடும் என அரசியல் தலைவர்கள் கவலை வெளியிட்டுள்ளனர்.

பணவீக்கத்தைக் கட்டுப்படுத்தும் நோக்கில் மத்திய வங்கி தொடர்ந்து நடவடிக்கைகளை முன்னெடுக்கும் என எதிர்பார்ப்பதாக வெஸ்ட்பேக் வங்கியின் தலைமை நிர்வாக அதிகாரி அந்தோனி மில்லர் தெரிவித்துள்ளார்.

வங்கியின் வருடாந்த இலாபம் சுமார் 7 பில்லியன் ஆஸ்திரேலிய டொலர்களாகப் பதிவாகியுள்ள நிலையில், அவர் இந்தக் கருத்தை வெளியிட்டுள்ளார்.

“பணவீக்கத்தைக் கட்டுப்படுத்தும் சவாலை மத்திய வங்கி மிகவும் தீவிரமாகக் கையாள்கிறது. இதுவரை நான்கு தடவைகள் வட்டி விகிதம் அதிகரிக்கப்பட்டுள்ளதுடன், இனிமேலும் ஒன்று அல்லது இரண்டு தடவைகள் அதிகரிக்கப்படலாம்” என அவர் குறிப்பிட்டுள்ளார்.

செப்டெம்பர் 30ஆம் திகதியுடன் நிறைவடைந்த நிதியாண்டில் வெஸ்ட்பேக் வங்கி 6.8 பில்லியன் டொலர் நிகர இலாபத்தைப் பதிவு செய்துள்ளது. இது முந்தைய ஆண்டுடன் ஒப்பிடுகையில் ஒரு சதவீத வீழ்ச்சியாகும்.

ஒருமுறை ஏற்படும் விசேட செலவுகள் மற்றும் வருமானங்களைத் தவிர்த்துக் கணக்கிடப்படும் வங்கியின் பண இலாபம் 7 பில்லியன் டொலர்களாக இருந்துள்ளது. அத்துடன், ஒரு பங்குக்கான வருடாந்த ஈவுத்தொகை 1.54 டொலர்களாக அறிவிக்கப்பட்டுள்ளது.

திங்கட்கிழமை வெளியிடப்பட்ட இந்த நிதி அறிக்கை, செவ்வாய்க்கிழமை ரிசர்வ் வங்கி வட்டி விகிதத்தை அதிகரிக்கும் என எதிர்பார்க்கப்படும் சூழலில் வெளியாகியுள்ளது. இதன்படி, அடிப்படை வட்டி விகிதம் 4.85 சதவீதமாக உயர்த்தப்படலாம் என எதிர்பார்க்கப்படுகிறது.

இந்த வட்டி அதிகரிப்பு நடைமுறைக்கு வந்தால், சராசரியான வீட்டுக் கடனைப் பெற்றுள்ள ஒருவர் ஆண்டுக்கு மேலதிகமாக 6,000 டொலர்களுக்கும் அதிகமான தொகையைச் செலுத்த வேண்டிய நிலை ஏற்படும் என அவுஸ்திரேலிய நிதி ஆய்வு நிறுவனம் தெரிவித்துள்ளது.

இதன் மூலம், 1980களுக்குப் பின்னர் முதல் தடவையாக, சராசரி விலையிலான வீட்டுக்கான அடமானக் கடனைச் செலுத்துவதற்கு குடும்பங்கள் தமது வருமானத்தில் மிக அதிகமான பகுதியைச் செலவிட வேண்டிய நிலை உருவாகும் எனக் கூறப்படுகிறது.

கடந்த செப்டெம்பர் மாதம் கருத்து வெளியிட்ட ரிசர்வ் வங்கியின் ஆளுநர் மிச்செல் புல்லொக், பணவீக்கத்தைக் குறைப்பதற்குத் தேவையானால் மீண்டும் வட்டி விகிதத்தை அதிகரிக்கத் தயங்கப் போவதில்லை எனத் தெரிவித்திருந்தார்.

எனினும், ஆஸ்திரேலியப் பிரதமர் அந்தோனி அல்பானீஸ், வட்டி விகிதத்தை அதிகரிப்பது ஒரு “முரட்டுத்தனமான கருவி” என விமர்சித்திருந்தார். ரிசர்வ் வங்கியின் நடவடிக்கை தொடர்பாக அவர் இவ்வாறு கருத்து வெளியிட்டது அரிதான நிகழ்வாகக் கருதப்படுகிறது.

இதனைத் தொடர்ந்து, நியூ சவுத் வேல்ஸ் மாநில முதல்வர் கிறிஸ் மின்ஸ், வட்டி விகிதம் மீண்டும் அதிகரிக்கப்பட்டால் வேலைவாய்ப்புகளும் வர்த்தக நிறுவனங்களும் இழக்கப்படும் என எச்சரித்துள்ளார்.

“இது மிகவும் எளிதான தீர்மானம் அல்ல. மீண்டும் வட்டி அதிகரிக்கப்பட்டால் நியூ சவுத் வேல்ஸ் மாநிலப் பொருளாதாரத்தில் பாரிய தாக்கம் ஏற்படும். இழக்கப்படும் சில வேலைவாய்ப்புகள் மீண்டும் உருவாகாது. மூடப்படும் சில வர்த்தக நிலையங்கள் மீண்டும் திறக்கப்படாது.

இந்த விடயத்தை நாம் சாதாரணமாக எடுத்துக்கொள்ள முடியாது. இது ரிசர்வ் வங்கிக்கு மிகவும் கடினமான தீர்மானமாகும்” என அவர் திங்கட்கிழமை ஊடகவியலாளர்களிடம் தெரிவித்துள்ளார்.

இதற்கிடையில், இந்த ஆண்டில் மேற்கொள்ளப்பட்ட நான்கு வட்டி அதிகரிப்புகளும், மே மாதம் முதல் தொழிற்கட்சி அரசாங்கம் அறிமுகப்படுத்திய வரி மாற்றங்களும் வீடமைப்புச் சந்தையில் தாக்கத்தை ஏற்படுத்தியுள்ளதாக வெஸ்ட்பேக் வங்கியின் தலைமை நிர்வாக அதிகாரி தெரிவித்துள்ளார்.

“இதுபோன்ற சூழ்நிலையை நாம் ஏற்கனவே எதிர்கொண்டுள்ளோம். 2008ஆம் ஆண்டுக்குப் பின்னர் இதுபோன்ற நான்கு பொருளாதார வீழ்ச்சிகளைச் சந்தித்துள்ளோம்” என அவர் குறிப்பிட்டுள்ளார்.

எனினும், அவுஸ்திரேலியாவில் வீடுகளுக்கான தேவை, கிடைக்கின்ற வீடுகளின் எண்ணிக்கையை விடவும் அதிகமாக இருப்பதே முக்கியமாகக் கவனத்தில் கொள்ளப்பட வேண்டிய விடயம் என்றும் அவர் தெரிவித்துள்ளார்.

அவுஸ்திரேலியப் பொருளாதாரத்தின் ஒட்டுமொத்த நிலை குறித்து நம்பிக்கை வெளியிட்ட அவர், வர்த்தக முதலீடுகள் வலுவாக இருப்பதையும் சுட்டிக்காட்டியுள்ளார். இத்தகைய முதலீடுகள் நாட்டின் பொருளாதாரத்தை மேம்படுத்த உதவும் என்றும் அவர் தெரிவித்துள்ளார்.

தொடர்ந்து அதிகரிக்கும் பணவீக்க அழுத்தம்

ரிசர்வ் வங்கியின் இரண்டு நாள் நாணயக் கொள்கைக் கூட்டத்தின் முடிவுகள் செவ்வாய்க்கிழமை பிற்பகல் 2.30 மணிக்கு வெளியாகவுள்ளன. அதன்போது வட்டி விகிதம் மீண்டும் அதிகரிக்கப்படுவதற்கு 82 சதவீத வாய்ப்புள்ளதாக நிதிச் சந்தைகள் மதிப்பிட்டுள்ளன.

அன்றைய தினம் மெல்பேர்ன் கிண்ணக் குதிரைப் பந்தயமும் நடைபெறவுள்ளது.

அவுஸ்திரேலியாவில் பணவீக்கம், ரிசர்வ் வங்கி நிர்ணயித்துள்ள 2 முதல் 3 சதவீத இலக்கை விடவும் அதிகமாகவே காணப்படுகிறது. செப்டெம்பர் மாதத்துடன் முடிவடைந்த 12 மாத காலப்பகுதியில் பணவீக்கம் எதிர்பார்ப்புகளைத் தாண்டி 4.3 சதவீதமாக உயர்ந்துள்ளது.

குடும்பங்களின் செலவினங்களைக் கட்டுப்படுத்துவதன் மூலம் பணவீக்கத்தைக் குறைப்பதே ரிசர்வ் வங்கியின் வட்டி அதிகரிப்பு நடவடிக்கையின் முக்கிய நோக்கமாகும். வட்டி அதிகரிப்பால் குடும்பங்களின் நிதிச்சுமை உயரும்போது, அவர்கள் செலவுகளைக் குறைக்க வேண்டிய நிலை ஏற்படும். இதன் மூலம் சந்தையில் பொருட்கள் மற்றும் சேவைகளுக்கான தேவை குறைந்து பணவீக்கமும் கட்டுப்பாட்டுக்குள் வரும் என்பது ரிசர்வ் வங்கியின் எதிர்பார்ப்பாகும்.

எனினும், சமீபத்திய புள்ளிவிபரங்களின்படி, ஆஸ்திரேலியக் குடும்பங்களின் செலவினங்கள் ஏற்கனவே தேக்கமடைந்துள்ளமை குறிப்பிடத்தக்கது.