ஆஸ்திரேலியாவின் விக்டோரியா மாநிலத் தேர்தலை முன்னிட்டு, ஆளும் தொழிலாளர் கட்சியின் பாரம்பரிய ஆதரவுத் தளங்களைக் கைப்பற்றும் நோக்கில் பசுமைக் கட்சி தீவிர தேர்தல் பிரசாரத்தில் இறங்கியுள்ளது.
எதிர்வரும் நவம்பர் 28ஆம் திகதி நடைபெறவுள்ள விக்டோரியா மாநிலத் தேர்தலில், மெல்பேர்னின் வடக்குப் பகுதியில் அமைந்துள்ள நார்த்கோட் தொகுதியை முக்கிய இலக்காகக் கொண்டு பசுமைக் கட்சி செயற்பட்டு வருகின்றது.
முன்னாள் பசுமைக் கட்சி செனட்டர் லிடியா தோர்ப் 2017ஆம் ஆண்டு இடைத்தேர்தலில் வெற்றி பெற்ற தொகுதியான நார்த்கோட்டில், இம்முறை தொழிலாளர் கட்சியைத் தோற்கடித்து மீண்டும் வெற்றிபெற பசுமைக் கட்சி முயற்சித்து வருகின்றது.
தற்போது விக்டோரியா நாடாளுமன்றத்தின் கீழவையில் தொழிலாளர் கட்சி 88 ஆசனங்களில் 54 ஆசனங்களையும், கூட்டணி 29 ஆசனங்களையும் கொண்டுள்ளன. பசுமைக் கட்சி மூன்று ஆசனங்களைத் தக்கவைத்துள்ளது.
இந்நிலையில், பிராக்ரன், ஃபுட்ஸ்க்ரே, பாஸ்கோ வேல், பிரஸ்டன் மற்றும் நார்த்கோட் ஆகிய தொகுதிகளைக் கைப்பற்ற பசுமைக் கட்சி இலக்கு நிர்ணயித்துள்ளது. இதன் மூலம் தொழிலாளர் கட்சியின் நாடாளுமன்றப் பெரும்பான்மையைப் பலவீனப்படுத்த முடியும் என அக்கட்சி நம்புகின்றது.
நார்த்கோட் தொகுதியில் பசுமைக் கட்சியின் வேட்பாளராகப் போட்டியிடும் கெம்பல் கோம், 2022ஆம் ஆண்டு தேர்தலில் தொழிலாளர் கட்சியின் வேட்பாளர் காட் தியோபனஸிடம் வெறும் 184 வாக்குகள் வித்தியாசத்தில் தோல்வியடைந்தார். இம்முறை தொகுதியைக் கைப்பற்றுவதற்காக வீடு வீடாகச் சென்று மக்களின் ஆதரவைத் திரட்டும் நடவடிக்கையில் ஈடுபட்டுள்ளார்.
இதற்கிடையில், விக்டோரியன் சோசலிஸ்ட் கட்சியும் நார்த்கோட் தொகுதியில் போட்டியிடுவதால், முற்போக்குக் கொள்கைகளைக் கொண்ட வாக்குகள் பிரிவடையக்கூடும் எனக் கருதப்படுகிறது.
பசுமைக் கட்சி தொழிலாளர் கட்சியிலிருந்து வாக்குகளைப் பெற முயற்சிக்கும் அதேவேளை, நீண்டகாலமாக ஆட்சியில் இருக்கும் தொழிலாளர் கட்சி மீதான மக்களின் அதிருப்தியையும் தமக்குச் சாதகமாகப் பயன்படுத்திக்கொள்ள முயற்சிக்கின்றது.
குறிப்பாக, வாக்காளர்களின் விருப்பு வாக்குகள் மற்றும் ஏனைய கட்சிகளின் விருப்பு வாக்குப் பரிமாற்றங்கள் தேர்தல் முடிவில் முக்கிய தாக்கத்தை ஏற்படுத்தும் என எதிர்பார்க்கப்படுகிறது.
