பாங்கொக்கிலுள்ள அவுஸ்திரேலிய தூதரகத்தின் பெண்கள் குளியல் அறையில் உளவு கமெரா ஒன்று கண்டு பிடிக்கப்பட்டதை அடுத்து முன்னாள் ஊழியர் ஒருவர் மீது வழக்கு தாக்கல் செய்யப்பட்டுள்ளது.
இந்த சம்பவம் தொடர்பான சந்தேக நபர் கடந்த மாதம் கைது செய்யப்பட்டதாக அவுஸ்திரேலியா வெளி விவகார மற்றும் வர்த்தக அமைச்சு உறுதிப்படுத்தியுள்ளது.
அனைத்து ஊழியர்களினதும் தனிப்பட்ட உரிமைகள் தொடர்பாகவும் நாங்கள் அக்கறையாக இருக்கிறோம். விசாரணைகளுக்கு சகலவிதமான ஒத்துழைப்பையும் நாங்கள் வழங்குகிறோம் என வெளி விவகார அமைச்சின் பேச்சாளர் ஒருவர் தெரிவித்துள்ளார்.
2021 ஆம் ஆண்டு ஒரு குளியலறையின் தரையில் பெண் ஊழியர்களின் படங்கள் அடங்கிய SD கார்ட் கண்டுபிடிக்கப்பட்ட பின்னர், பெண்களின் குளியலறைகளில் ஷவர் மற்றும் கழிப்பறைகளை எதிர்கொள்ளும் பல கமராக்கள் கண்டுபிடிக்கப்பட்டன. கமராக்கள் எவ்வளவு காலமாக வைக்கப்பட்டிருந்தன என்பது தெளிவாகத் தெரியவில்லை என தெரிவிக்கப்பட்டுள்ளது.
30 வயதான இரட்டை பிரஜாவுரிமையை வைத்திருக்கும் தாயலாந்தைச்சேர்ந்த தகவல் தொழில் நுட்ப முகாமையாளரே கமராக்களை பொருத்தியிருப்பது தெரிய வந்துள்ளது. பாங்கொக்கிலுள்ள அவுஸ்திரேலிய தூதரகம் இராஜதந்திர ரீதியில் சர்வதேச அளவில் முக்கியத்துவமான ஒன்று; இப்படிப்பட்ட முக்கியத்துவம் வாய்ந்த ஒரு அலுவலகத்தின் பாதுகாப்பு இவ்வளவு தூரம் ஓட்டையாக இருந்ததா என்ற கேள்வி தற்போது எழுந்துள்ளதாக அவுஸ்திரேலிய ஊடகங்கள் சுட்டிக்காட்டியுள்ளன
