பச்செல்வனின் இரண்டு நூல்களை சுங்கம் தடுத்து வைத்திருப்பது அவரது அடிப்படை உரிமைகளை மீறுவதாகக் கண்டறிந்து, அவற்றை உடனடியாக விடுவிக்குமாறு இலங்கை மனித உரிமைகள் ஆணைக்குழு பரிந்துரைத்துள்ளது.
இது குறித்து அறிக்கை ஒன்றை வெளியிட்டுள்ள இலங்கை மனித உரிமைகள் ஆணைக்குழு, 2026 மார்ச் 27 அன்று சென்னையிலிருந்து இறக்குமதி செய்யப்பட்ட நான்கு நூல்களைப் பறிமுதல் செய்ய சிறிலங்கா சுங்கத் திணைக்களத்தின் பணிப்பாளர் நாயகம் எடுத்த முடிவை ஆணைக்குழு ஆய்வு செய்தது என்று கூறியுள்ளது.
‘இப்போதும் இங்கே இரண்டு தேசங்கள்தான்’, ‘எழுத்தால் நான் யுத்தம் செய்கிறேன்’, ‘பயங்கரவாதி’ மற்றும் ‘சயனைட்’ ஆகிய நூல்களே தடுத்து வைக்கப்பட்டன.
இலங்கை கலைப் பேரவை மற்றும் அரச இலக்கிய உப-குழு ஆகியவற்றின் மதிப்பீட்டைத் தொடர்ந்து, பிந்தைய இரண்டு நூல்களும் புனைகதைகள் என நிபுணர்களால் வகைப்படுத்தப்பட்டு விடுவிக்கப்பட்டன.
‘இப்போதும் இங்கே இரண்டு தேசங்கள்தான்’ நூலின் 75 பிரதிகளும், ‘எழுத்தால் நான் யுத்தம் செய்கிறேன்’ நூலின் 147 பிரதிகளும் தொடர்ந்து தடுத்து வைக்கப்பட்டிருந்தன.
“சுங்கக் கட்டளைச் சட்டம் மற்றும் தண்டனைச் சட்டக்கோவையின் பிரிவு 120 ஆகியவற்றின் கீழ் பறிமுதல் நடவடிக்கையைத் தொடர்ந்து நியாயப்படுத்துவதற்குத் தேவையான நோக்கத்தையோ அல்லது அதனால் ஏற்படக்கூடிய பாதிப்புக்கான சாத்தியத்தையோ அதிகாரிகள் நிரூபிக்கத் தவறிவிட்டனர்.
கேள்விக்குரிய பகுதிகள் சில வாசகர்களுக்கு மனக்கசப்பையோ அல்லது சங்கடத்தையோ ஏற்படுத்தக்கூடும் என்றாலும், இத்தகைய கட்டுப்பாடுகளை நியாயப்படுத்தத் தேவையான நேரடித் தூண்டுதலை அவை வெளிப்படுத்தவில்லை.
இந்தத் தொடர் பறிமுதல் நடவடிக்கையானது, “அரசியலமைப்பின் 14(1)(a) பிரிவின் கீழ் உத்தரவாதம் அளிக்கப்பட்டுள்ள எழுத்தாளரின் கருத்து மற்றும் வெளியீட்டுச் சுதந்திரத்தை மீறும் வகையிலான, தேவையற்ற மற்றும் விகிதாசாரமற்ற முற்கூட்டிய தணிக்கையாக அமைகிறது.
சட்டத்தின் முன் சமத்துவம் மற்றும் மொழி அடிப்படையில் பாகுபாடு காட்டாமை தொடர்பான 12(1) மற்றும் 12(2) ஆகிய பிரிவுகளின் மீறல்களையும் ஆணைக்குழு கண்டறிந்தது.
மேலும், இந்தப் பறிமுதல் நடவடிக்கையானது, தனது சொந்த கலாச்சாரத்தை அனுபவிக்கவும் மேம்படுத்தவும் மற்றும் தனது சொந்த மொழியைப் பயன்படுத்தவும் எழுத்தாளருக்கு உள்ள 14(1)(f) பிரிவின் கீழான உரிமையை மீறுவதாகவும் ஆணைக்குழு தீர்ப்பளித்தது.
அந்த இரண்டு நூல்களின் தடுத்து வைக்கப்பட்ட அனைத்துப் பிரதிகளையும் உடனடியாக விடுவிக்குமாறு இலங்கை சுங்கத் திணைக்களத்திற்கு ஆணைக்குழு பரிந்துரைத்தது.
