செம்மணி புதைகுழி தொடர்பில் நீதிமன்றம் வழங்கும் உத்தரவுக்கமைய உரிய விசாரணைகளை முன்னெடுப்பதற்கு அரசாங்கம் தயாராகவே உள்ளது என்று அமைச்சரவைப் பேச்சாளரும், அமைச்சருமான நளிந்த ஜயதிஸ்ஸ தெரிவித்தார்.
செம்மணி விவகாரம் தொடர்பில் சர்வதேச விசாரணை கோரப்பட்டுவரும் நிலையிலேயே அவர் இவ்வாறு கூறியுள்ளார்.
அமைச்சரவை முடிவுகளை அறிவிக்கும் வாராந்த ஊடகவியலாளர் மாநாடு அரசாங்க தகவல் திணைக்களத்தில் நேற்று நடைபெற்றது.
இதன்போது செம்மணி புதைகுழி விவகாரம் தொடர்பில் எழுப்பட்ட கேள்விகளுக்கு பதிலளித்த அமைச்சர்,
" செம்மணி புதைகுழியில் 2025 ஜுலை 07 ஆம் திகதிவரை 44 மனித என்புத் தொகுதிகள் அடையாளம் காணப்பட்டுள்ளன. அடுத்த வழக்கு விசாரணை எதிர்வரும் 25 ஆம் திகதி நடைபெறவுள்ளது. இதன்போது சம்பந்தப்பட்ட தரப்புகளால் விசாரணை அறிக்கைகள் முன்வைக்கப்படவுள்ளன.
நீதிமன்ற நடவடிக்கைகளுக்கு அரசாங்கம் முழுமையான ஒத்துழைப்புகளை வழங்கிவருகின்றது. சிஐடி மற்றும் பொலிஸார் அதற்காக ஈடுபடுத்தப்பட்டுவருகின்றனர். நீதிமன்றத்தின் தேவைக்கமைய அதற்குரிய விசாரணைகள் அரசாங்கத்தால் முன்னெடுக்கப்படும்." - என்று குறிப்பிட்டார்.
