தென் கொரிய ஜனாதிபதி யூன் சுக்-யியோலை பதவி நீக்குவது தொடர்பில் நிறைவேற்றப்பட்ட தீர்மானம் சரியானதே என அந்நாட்டின் அரசியலமைப்பு நீதிமன்றம் தீர்ப்பளித்துள்ளது.
தென்கொரியாவில் எதிர்க்கட்சியினர், வடகொரியாவுடன் இணைந்து நாடாளுமன்றத்தை முடக்க சதித்திட்டம் தீட்டுவதாகக் கூறி, ஜனாதிபதி யூன் சுக் இயோல் கடந்த டிசம்பர் மாதத்தில் இராணுவ அவசர நிலையை அறிவித்தார்.
இராணுவ அவசர நிலைக்கு, நாடு முழுவதும் எதிர்ப்புகள் கிளம்பியதால், சில மணி நேரங்களில் இந்த உத்தரவு வாபஸ் பெறப்பட்டது.
அத்துடன், இராணுவ அவசர நிலை உத்தரவு என்பது கிளர்ச்சிக்கு சமமானது என்று யூன் சுக் மீது பல்வேறு தரப்பினர் குற்றம் சாட்டினர்.
இதனைத் தொடர்ந்து, அவர் கைது செய்யப்பட்டு பின்னர் விடுவிக்கப்பட்டார். அவரை பதவி நீக்குவதற்கு நாடாளுமன்றத்திலும் தீர்மானம் நிறைவேற்றப்பட்டது.
இது தொடர்பான வழக்கு விசாரணையில், தென் கொரிய ஜனாதிபதி யூன் சுக்-யியோலை பதவி நீக்கம் செய்து அதிரடி உத்தரவை, அரசியலமைப்பு நீதிமன்றம் பிறப்பித்துள்ளது.
இராணுவச் சட்டத்தை அறிவித்ததன் மூலம் அவர் அடிப்படை உரிமைகளை மீறியதாகக் கூறி தீர்ப்பு வழங்கப்பட்டுள்ளது.
பதவி நீக்கம் உறுதி செய்யப்பட்ட செய்தியை அறிந்து ஆர்ப்பாட்டக்காரர்கள் வீதிகளில் கொண்டாடி ஆரவாரம் செய்தனர். தென் கொரிய அதிபர் யூன் சுக்-யியோல் பதவி நீக்கம் செய்யப்பட்டுள்ளதால், அடுத்த இரு மாதங்களுக்குள் தேர்தல் நடத்தப்படலாம் என்று தகவல்கள் தெரிவிக்கின்றன.
அதேவேளை, தென்கொரியா செல்லும் மற்றும் தென்கொரியாவில் உள்ள தமது நாட்டு பிரஜைகளுக்கு ஆஸ்திரேலியா பயண எச்சரிக்கை விடுத்துள்ளது.
உள்நாட்டு அரசியல் நடவடிக்கைகளில் பங்கேற்க வேண்டாம் எனவும், அந்நாட்டு பாதுகாப்பு தரப்பின் அறிவுறுத்தல்களை பின்பற்றுமாறும் வலியுறுத்தப்பட்டுள்ளது.
