ஆஸ்திரேலியா விக்டோரியா மாநிலத்தில் H5N1 பறவைக் காய்ச்சல் பாதிப்புகள் தொடர்ந்து அதிகரித்து வரும் நிலையில், கோழி மற்றும் பறவைப் பண்ணையாளர்கள் தங்கள் பறவைகளைப் பண்ணைகளுக்குள்ளேயே அடைத்து வளர்க்குமாறு (house their birds) கட்டாயப்படுத்தப்பட்டுள்ளனர்.

ஏற்கனவே விருப்பத்தின் பேரில் கடைப்பிடிக்கப்பட்டு வந்த இந்த நடைமுறை, தற்போது கட்டாயமாக்கப்பட்டுள்ளது. இதன்படி, 50-க்கும் மேற்பட்ட பறவைகளை வளர்க்கும் அனைவரும் இனி அவற்றைப் பண்ணைக்குள் பூட்டி வைக்க வேண்டும்.

நோய்ப் பரவலைத் தடுக்கும் நோக்கிலேயே அரசாங்கம் இந்த நடவடிக்கையை எடுத்துள்ளதாக விவசாயத்துறை அமைச்சர் மைக்கேலா செட்டில் (Michaela Settle) தெரிவித்துள்ளார்.

"எமது தொழிற்துறையைப் பாதுகாப்பதற்காக எடுக்கப்பட்ட முன்எச்சரிக்கை நடவடிக்கை இதுவாகும்" என்று கூறிய அவர், "வளர்ப்புப் பறவைகள் வனவிலங்குகளுடன் தொடர்பு கொள்வதைத் தடுப்பதே இதன் முக்கிய நோக்கமாகும்" என்றும் குறிப்பிட்டார்.

இதன் மூலம் ஆஸ்திரேலியாவில் கோழிப் பண்ணைத் தொழிற்துறைக்கு இவ்வாறான ஊரடங்கு/கட்டுப்பாடுகளை (lockdown) நடைமுறைப்படுத்திய முதல் மாநிலமாக விக்டோரியா மாறியுள்ளது.

சூழ்நிலையை அரசு தொடர்ந்து மதிப்பீடு செய்து வரும் நிலையில், இந்த அடைத்து வளர்க்கும் உத்தரவு முதற்கட்டமாக 14 நாட்களுக்கு அமுலில் இருக்கும்.

முன்னதாக, எஸ்பிரான்ஸ் (Esperance) அருகே இடம்பெயரும் பறவை ஒன்றில் ஆபத்தான H5 பறவைக் காய்ச்சல் வைரஸ் கண்டறியப்பட்டதை அடுத்து, கடந்த ஜூன் மாதம் 'இங்ஹாம்ஸ்' (Ingham's) கோழிப் பண்ணை நிறுவனம் மேற்கு ஆஸ்திரேலியாவில் (WA) தனது செயல்பாடுகளை முடக்கியது நினைவுகூரத்தக்கது.

யம்புக் (Yambuk), அப்பல்லோ பே (Apollo Bay) மற்றும் கிளைட் (Clyde) ஆகிய பகுதிகளில் புதிதாகப் பறவைக் காய்ச்சல் கண்டறியப்பட்டதே இந்தத் தீவிர நடவடிக்கைக்குக் காரணம் என்று விக்டோரியாவின் தலைமை கால்நடை அதிகாரி டாக்டர் கிரஹாம் குக் (Graeme Cook) தெரிவித்துள்ளார். 

அதேவேளை, ஆஸ்திரேலிய தலைமை கால்நடை அதிகாரி பெத் குக்சன் (Beth Cookson) வெள்ளிக்கிழமை வெளியிட்ட தகவலில், போர்ட்லேண்ட் மற்றும் நெல்சன் பகுதிகளைச் சேர்ந்த கொண்டை ஆலாக்கள் (greater crested terns) பறவைகளிடம் நடத்தப்பட்ட பரிசோதனையில் மேலும் 20 பறவைகளுக்குப் பாதிப்பு உறுதி செய்யப்பட்டுள்ளதாகத் தெரிவித்தார்.