சிட்னி விமான நிலையத்தின் ஓடுபாதை இணைப்புச் சந்தியில் (Intersection) இன்று காலை இரண்டு விமானங்கள் ஒன்றுடன் ஒன்று மோதும் அபாயத்தில் இருந்து நூலிழையில் தப்பின. இந்தச் சம்பவத்தில் விமானப் பணிப்பெண் ஒருவர்  காயமடைந்தது குறித்து விசாரணை தொடங்கப்பட்டுள்ளது.

100-க்கும் மேற்பட்ட பயணிகளுடன் 'கோல்ட் கோஸ்ட்' (Gold Coast) நோக்கிச் செல்லத் தயாராக இருந்த 'ஜெட்ஸ்டார் ஏர்பஸ் ஏ320' (Jetstar Airbus A320) ரக விமானம், ஓடுபாதையை நோக்கிச் சென்று கொண்டிருந்தது. 

அப்போது, அதே இணைப்புச் சந்தியைப் பயன்படுத்திய 'கத்தார் ஏர்வேஸ் போயிங் 777' (Qatar Airways Boeing 777) ரக விமானத்தின் மீது அது மோதும் சூழல் ஏற்பட்டது.

இதனை உடனடியாகக் கவனித்த ஜெட்ஸ்டார் விமானிகள் அவசரமாகப் பிரேக் பிடித்து விமானத்தை நிறுத்தினர். அப்போது, விமானத்தில் இறுதிப்பரிசோதனைகளைச் செய்துகொண்டிருந்த பணிப்பெண் ஒருவர் நிலைதடுமாறி கீழே விழுந்து  காயமடைந்தார். அவருக்கு சிகிச்சை அளிக்கப்பட்டது. 

அதிர்ஷ்டவசமாக பயணிகள் எவருக்கும் எவ்வித காயமும் ஏற்படவில்லை.

அந்த நேரத்தில் கத்தார் ஏர்வேஸ் விமானத்திற்குள் பயணிகள் யாரும் இல்லை என்றும், அது ஒரு இழுவை வண்டி (Tug) மூலம் இழுத்துச் செல்லப்பட்டுக்கொண்டிருந்தது என்றும் நம்பப்படுகிறது. இருப்பினும், அந்த விமானம்  சேதமடைந்துள்ளது.

இந்த மோதல் அபாயத்திற்கான காரணம் என்னவென்று இன்னும் தெளிவாகத் தெரியவில்லை. எனினும், ஆஸ்திரேலிய தேசிய போக்குவரத்து பாதுகாப்பு புலனாய்வு அமைப்பான ATSB, இதுகுறித்து விசாரணையைத் தொடங்கியுள்ளது.

குறுக்கு ஓடுபாதையில் பிரம்மாண்டமான கத்தார் ஏர்வேஸ் விமானம் வருவதை ஜெட்ஸ்டார் விமானப் பணியாளர்களே முதலில் கவனித்துள்ளதாக ATSB தெரிவித்துள்ளது.