கடந்த வாரம் தவறான அடையாளத்தால் அப்பாவி ஒருவர் சுட்டுக்கொல்லப்பட்ட பாதாள உலகத் தாக்குதலுக்கு ட்ரோன் மூலம் உளவு பார்த்ததாக 18 வயது இளைஞர் மீது காவல்துறை வழக்குப் பதிவு செய்துள்ளது.

மேற்கு சிட்னியைச் சேர்ந்த பிரபல தொழிலாளியான ஜோஷுவா மெக்டொனால்டு (40) கொலை செய்யப்பட்ட வழக்கில், ஜிம்மி ஷூல்ட்ஸ் (18) என்ற இளைஞர் நேற்று வெஸ்ட் ஹாக்ஸ்டனில் வைத்து 'ராப்டர் ஸ்பாட்' (Raptor Squad) காவல்துறையினரால் கைது செய்யப்பட்டார்.

ஜிம்மி ஷூல்ட்ஸிடம் இருந்து பறிமுதல் செய்யப்பட்ட ட்ரோன், இந்த கொலையில் அவருக்கு உள்ள தொடர்பை உறுதிப்படுத்துவதாக காவல்துறையினர் தெரிவித்துள்ளனர்.

கடந்த செப்டம்பர் 2 அன்று, மெரிலேண்ட்ஸ் வெஸ்ட் பகுதியில் உள்ள ஒரு வீட்டிற்கு வெளியே பட்டப்பகலில் ஜோஷுவா மெக்டொனால்டு சுட்டுக்கொல்லப்பட்டார்.

 பிரபல 'அலமேடின்' (Alameddine) குற்றவியல் கும்பலைச் சேர்ந்த ஒருவரைக் குறிவைத்து நடத்தப்பட்ட இந்தத் தாக்குதலில், தவறான அடையாளம் காரணமாக ஜோஷுவா பலியானதாகக் காவல்துறை வட்டாரங்கள் தெரிவித்துள்ளன.

அலமேடின் கும்பலின் மூத்த உறுப்பினர்கள் லெபனானில் இருக்கும் நிலையில், அவர்களுக்கும் "கோகோனட் கார்டெல்" (Coconut Cartel) என்ற கும்பலுக்கும் இடையே நிலவும் மோதலே தற்போதைய வன்முறைகளுக்குக் காரணம் என காவல்துறை நம்புகிறது.

இதுகுறித்து நியூ சவுத் வேல்ஸ் (NSW) காவல்துறை கொலப்பிரிவு கண்காணிப்பாளர் ஜோ டுவேஹி கூறுகையில், காரின் பின்பகுதியில் அமர்ந்து ட்ரோன் மூலம் யாரையோ அல்லது ஒரு இடத்தை உளவு பார்த்தபோதே அந்த 18 வயது இளைஞர் கைது செய்யப்பட்டதாகத் தெரிவித்தார். 

சமீபகாலமாக அப்பாவி மக்கள் சுட்டுக்கொல்லப்படுவது குறித்துக் கேட்டபோது, பாதாள உலகக் கும்பல்கள் எவ்வாறு இவ்வளவு பெரிய தவறுகளைச் செய்கின்றன என்பது புரியவில்லை என அவர் வேதனை தெரிவித்தார்.

கைது செய்யப்பட்ட ஜிம்மி ஷூல்ட்ஸுடன் இருந்த ரது வில்லியமே கொரோயிடமனா (19) என்ற மற்றொரு இளைஞரும் கைது செய்யப்பட்டுள்ளார். இவர் 'குரோனுல்லா ஷார்க்ஸ்' (Cronulla Sharks) ரக்பி லீக் அணியின் வளரும் நட்சத்திர வீரர் ஆவார்.

இவர் மீது குற்றவியல் கும்பலில் பங்கேற்றது மற்றும் ஓட்டுநர் உரிமம் இன்றி வாகனம் ஓட்டியது ஆகிய பிரிவுகளின் கீழ் வழக்குப் பதிவு செய்யப்பட்டுள்ளது. இருப்பினும், ஜோஷுவா கொலையில் இவருக்குத் தொடர்பிருப்பதாகக் குற்றம் சாட்டப்படவில்லை.

இது தொடர்பாக கருத்து தெரிவித்துள்ள ஷார்க்ஸ் அணியின் செய்தி தொடர்பாளர், "எங்கள் அகாடமியைச் சேர்ந்த வீரர் நீதிமன்றத்தில் ஆஜர்படுத்தப்பட்ட விவகாரம் தொடர்பில் என்.ஆர்.எல் (NRL) நேர்மைப் பிரிவுக்குத் தகவல் தெரிவிக்கப்பட்டுள்ளது. வழக்கு நீதிமன்றத்தில் இருப்பதால் மேற்கொண்டு கருத்து எதுவும் கூற முடியாது" எனத் தெரிவித்துள்ளார்.

கடந்த 18 மாதங்களில் பாதாள உலக மோதலால் தவறான அடையாளப் பட்டியலில் பலியான 7-வது அப்பாவி நபர் ஜோஷுவா என்பது குறிப்பிடத்தக்கது. இவரது மறைவைத் தொடர்ந்து சிட்னியின் பாதாள உலகக் கும்பல்களை ஒடுக்குவதற்கான சட்டங்களை வலுப்படுத்துவது குறித்தான விவாதங்கள் மீண்டும் தீவிரமடைந்துள்ளன.

கைது செய்யப்பட்ட 18 வயது இளைஞருக்கு லிவர்பூல் உள்ளூர் நீதிமன்றம் பிணை வழங்கியுள்ள நிலையில், இம்மாத இறுதியில் அவர் மீண்டும் நீதிமன்றத்தில் ஆஜர்படுத்தப்படுவார் என எதிர்பார்க்கப்படுகிறது.