தேசிய இனப்பிரச்சினைக்கு புதிய அரசமைப்பின் ஊடாக அரசியல் தீர்வு திட்டத்தை முன்வைக்கும் உறுதியான காலப்பகுதியை ஜனாதிபதி அநுரகுமார திஸாநாயக்க தலைமையிலான தேசிய மக்கள் சக்தி அரசாங்கம் அறிவிக்க வேண்டும் என்று இலங்கைத் தமிழரசுக் கட்சி வலியுறுத்தியுள்ளது.
புதிய அரசமைப்பை இயற்றுவதற்குரிய பணியை முதல் வருடத்துக்குள்ளேயே முன்னெடுக்காவிடின், இலக்கை நோக்கி நகர்வது நெருக்கடியாக அமையும் என தமிழரசுக் கட்சியின் மட்டக்களப்பு மாவட்ட நாடாளுமன்ற உறுப்பினர் இரா. சாணக்கியன் தெரிவித்தார்.
இது தொடர்பில் அவர் மேலும் கூறியவை வருமாறு,
' 2015 மற்றும் 2017 வரையான காலப்பகுதியில் புதிய அரசமைப்பை இயற்றுவதற்குரிய வரைவு நகல் தயாரிக்கப்பட்டது. இதற்கு தேசிய மக்கள் சக்தியும் இணங்கியது. புதிய அரசமைப்புக்குரிய சட்டமூலம் நாடாளுமன்றத்தில் முன்வைக்கப்படவிருந்த தருவாயில்தான் அப்போது ஜனாதிபதியாக இருந்த மைத்திரிபால சிறிசேன மஹிந்த ராஜபக்சவை பிரதமராக்கி, அரசியல் சூழ்ச்சியில் ஈடுபட்டார். இதனையடுத்து புதிய அரசமைப்புக்குரிய பணிகள் தொடரவில்லை.
எனினும், இந்த அரசமைப்பு இறுதிப்படுத்தப்பட்டு நிறைவேற்றப்படும் என்று தேசிய மக்கள் சக்தி உறுதியளித்துள்ளது. எனவே, புதிய அரசமைப்பை தேசிய மக்கள் சக்தி வெற்றிகரமாக நிறைவேற்றும் என்பது அக்கட்சிக்கு வாக்களித்த மக்களின் பிரதான எதிர்பார்ப்புகளில் ஒன்றாகும்.
முதல் வருடத்துக்குள்ளேயே இதற்குரிய நடவடிக்கை முன்னெடுக்கப்பட வேண்டும். அவ்வாறு இல்லாவிட்டால் அதனை முன்னெடுப்பது நெருக்கடியாகக்கூட அமையலாம்.
தேசிய மக்கள் சக்திக்கு கூட்டணி பலம் இல்லாமலேயே 159 ஆசனங்கள் கிடைக்கப்பெற்றுள்ளன. கடந்த காலங்களில்போல் பங்காளிக்கட்சிகளின் பிரச்சினைகள் எழாது. எனவே, 3 வருடங்கள்வரை காத்திருக்காது, அதனை செய்துமுடிக்க வேண்டும்.
தேசிய இனப்பிரச்சினைக்கு புதிய அரசமைப்பின் ஊடாக தீர்வு வழங்கப்படும் என அரச தரப்பில் கூறப்பட்டுள்ளது. எமக்குரிய அரசியல் உரிமைகளைப் பற்றி பேசுவது இனவாதம் கிடையாது. எனவே, தீர்வை வழங்கும் காலப்பகுதியை அரசாங்கம் அறிவிக்க வேண்டும்." - என்றார் இரா. சாணக்கியன்.
