மெல்போர்னில் நேற்று இரவு நடைபெற்ற One Nation கட்சியின் பலத்த பாதுகாப்புடன் கூடிய நிதி திரட்டும் நிகழ்விலிருந்து, கோபமடைந்த போராட்டக்காரர்களின் எதிர்ப்புக் காரணமாக Pauline Hanson மற்றும் Barnaby Joyce ஆகியோர் பின்வாசல் வழியாக வெளியேற வேண்டிய கட்டாயத்திற்கு தள்ளப்பட்டனர்.
பாதுகாப்பு காரணங்களினால் கடைசி நிமிடத்தில் மாற்றப்பட்ட, தெற்கு மெல்போர்னில் உள்ள நிகழ்விடத்தின் வெளியில் ஆர்ப்பாட்டக்காரர்கள் வீதிகளில் திரண்டிருந்தனர்.
இதன்போது, ஒருவர் காவல்துறையினரால் கைதுசெய்யப்பட்டார்.
தான் ஒரு 'One Nation ' கட்சியின் ஆதரவாளர் என்று கூறிக்கொண்ட அந்த நபர், காவல்துறையினரால் பிடிக்கப்பட்டு, விலங்கிடப்பட்டு, சிறிது நேரத்திலேயே பொலிஸ் வாகனத்தில் ஏற்றப்பட்டு அங்கிருந்து அழைத்துச் செல்லப்பட்டார்.
காவல்துறையினரால் தடுத்து வைக்கப்பட்டிருந்த போது அந்த நபர், "மூன்றாம் உலகத்தைச் சேர்ந்த பெருந்திரளான மக்கள் இந்த நாட்டிற்குள் வெள்ளமென நுழைவதைத் தடுத்து, ஒரு வெள்ளை ஆஸ்திரேலியாவை (White Australia) மீண்டும் நிலைநிறுத்த அவர் (ஹான்சன்) விரும்புகிறார்," என்று கத்தினார்.
போராட்டக்காரர்கள் கலைந்து செல்ல மறுத்து, "குடியேறிகளை வரவேற்கிறோம், கோடீஸ்வரர்களை அல்ல" போன்ற கோஷங்களை எழுப்பியதால், ஹான்சன் மற்றும் ஜாய்ஸ் ஆகியோர் ரகசியமாக அங்கிருந்து வெளியேற வேண்டியதாயிற்று.
மெல்போர்னின் தெற்குப் பகுதியில் உள்ள புதிய அரங்கைச் சுற்றி காவல்துறையினரின் பலத்த பாதுகாப்பு வளையம் அமைக்கப்பட்டிருந்த நிலையில், மாலை 6 மணிக்கு சற்று முன்பாக ஹான்சன் அங்கு வந்தடைந்தார். அப்போது ஒரு சில போராட்டக்காரர்கள் வெளியில் கூடியிருந்தனர்.
இந்த நிதி திரட்டும் நிகழ்ச்சி முதலில் Moonee Ponds உள்ள Giorgio Casa என்ற இத்தாலிய உணவகத்தில் திட்டமிடப்பட்டிருந்தது.
இருப்பினும், இனவாத எதிர்ப்பு போராட்டக்காரர்கள் உணவகத்திற்கு வெளியே ஆர்ப்பாட்டம் நடத்தப்போவதாக அச்சுறுத்தியதை அடுத்து, முழுமையாக முன்பதிவு செய்யப்பட்டிருந்த அந்த நிகழ்வை உணவக நிர்வாகம் ரத்து செய்தது.
நிகழ்வு தொடங்குவதற்கு ஒரு மணி நேரத்திற்கு முன்பே இந்த கடைசி நிமிட மாற்றம் செய்யப்பட்ட போதிலும், ஹான்சன் இதனால் பதற்றமடைந்ததாகத் தெரியவில்லை.
நிகழ்விடத்திற்கு வந்தடைந்த போது ' செய்தியாளர்களிடம் பேசிய ஒன் நேஷன் தலைவர் ஹான்சன், காக்டெய்ல் விருந்து மற்றும் நிதி திரட்டும் நிகழ்விற்கான விருந்தினர்களின் பட்டியல் அதிகரித்ததன் காரணமாகவே இந்த மாற்றம் செய்யப்பட்டதாகக் கூறினார்.
விக்டோரியா மாநிலத்தில் தனது ஆதரவைத் திரட்டவும், தொழிலாளர் கட்சி (Labor government) அரசாங்கத்திற்கு எதிரான மக்களின் கோபத்தைப் பயன்படுத்திக் கொள்ளவும் One Nation தலைவர் திட்டமிட்டுள்ளார்.
"நாம் ஒரு ஜனநாயக நாட்டில் இருக்கிறோம், இங்கே நமது கருத்தைக் கூறவும், நமது அபிப்பிராயத்தை வெளிப்படுத்தவும் நமக்கு உரிமை உண்டு," என்று நிகழ்வுக்கு வெளியே செய்தியாளர்களிடம் ஹான்சன் தெரிவித்தார்.
