மேற்கு சிட்னியில் பொலிஸாரால் சுடப்பட்ட நபர் ஒருவர், அவசர அறுவை சிகிச்சைக்கு உட்படுத்தப்பட்டுள்ளார்.

வியாழக்கிழமை இரவு சுமார் 7:30 மணியளவில்,  Fairfield இல் உள்ள லாசன் தெருவில் (Lawson Street) இருக்கும் ஒரு அடுக்குமாடி குடியிருப்பு வளாகத்தில் வன்முறை கலவரம் நடப்பதாக வந்த தகவலை அடுத்து பொலிஸார் அங்கு வரவழைக்கப்பட்டனர்.

உதவி ஆணையர்  Brett McFadden இதுகுறித்து கூறுகையில், அதிகாரிகள் சம்பவ இடத்திற்கு வந்தபோது அவர்களுக்கு "ஆக்ரோஷமான குரல்கள்" கேட்டதாகவும், அங்குள்ள ஒரு குடியிருப்பு பிரிவின் வாசலில் ரத்தம் இருப்பதைக் கண்டறிந்ததாகவும் தெரிவித்தார்.

அங்கு இருந்த 27 வயதுடைய நபர் ஒருவரிடம் பொலிஸார் பேச முயன்றபோது, அவர் அவர்களை நோக்கி பாய்ந்து தாக்கத் தொடங்கினார் என்று அவர் கூறினார்.

அப்போது, அங்கிருந்த ஒரு இளம் பெண் பொலிஸ் கான்ஸ்டபிள் தனது துப்பாக்கியால் பலமுறை சுட்டதில், அந்த நபரின் உடற்பகுதியின் முன்புறத்தில் (Torso) இரண்டு முறையும், கையில் ஒரு முறையும் குண்டுகள் பாய்ந்தன.

துப்பாக்கிச் சூட்டிற்குப் பின்னரும், அந்த நபர் தொடர்ந்து அந்த பெண் பொலிஸ் அதிகாரியை நோக்கி ஓடிவந்து, அவரை தரையில் தள்ளி வீழ்த்தியதாக உதவி ஆணையர் மெக்பேடன் தெரிவித்தார்.

பின்னர், அங்கிருந்த மற்ற இரண்டு அதிகாரிகளால் அந்த நபர் கட்டுப்படுத்தப்பட்டார். சம்பவ இடத்திலேயே அவருக்கு முதலுதவி அளித்த மருத்துவ உதவியாளர்கள், அவரை ஆபத்தான நிலையில் அவசர அறுவை சிகிச்சைக்காக மருத்துவமனைக்கு கொண்டு சென்றனர். 
 
துப்பாக்கிச் சூடு நடத்தப்பட்ட நேரத்தில், அந்த நபர் எந்தவிதமான ஆயுதமும் ஏந்தியிருக்கவில்லை என்று உதவி ஆணையர் மெக்ஃபேடன் குறிப்பிட்டுள்ளார்.

இந்த சம்பவம் தொடர்பான சூழ்நிலைகள் குறித்து பாங்க்ஸ்டவுன் பொலிஸ் பகுதி கமாண்டின் (Bankstown Police Area Command) ஒரு தீவிர விசாரணை குழு விசாரணை நடத்தும்.

இந்த விசாரணை, சட்ட அமலாக்க நடத்தை ஆணையத்தின் (Law Enforcement Conduct Commission - LECC) மேற்பார்வையின் கீழ் ஒரு சுயாதீனமான ஆய்வுக்கு உட்படுத்தப்படும்.

இச்சம்பவத்தின் போது பொலிசாரின் உடலில் பொருத்தப்பட்டிருந்த கேமரா (Bodyworn camera) காட்சிகள் ஆய்வு செய்யப்பட்டுள்ளன, மேலும் அவை விசாரணையின் ஒரு பகுதியாக அமையும்.