ஆஸ்திரேலியாவின், கோல்ட் கோஸ்ட் (Gold Coast) பகுதியில் உள்ள ஹோப் தீவில் ஏற்பட்ட தீ விபத்தில் ஒருவர் உயிரிழந்துள்ளார், மேலும் இருவர் உயிருக்குப் போராடி வருகின்றனர். 

இந்தத் தீ விபத்து திட்டமிட்டு நடத்தப்பட்டதாக காவல்துறை சந்தேகிக்கின்றது.

செவ்வாய்க்கிழமை இரவு சுமார் 11:45 மணியளவில், ஹோப் ஐலேண்டில் (Hope Island) உள்ள சிக்கிள் அவென்யூவில் (Sickle Ave) அமைந்திருந்த அந்த வீட்டிற்கு மர்ம நபர் ஒருவர் தீ வைத்துள்ளதாக காவல்துறை தெரிவித்துள்ளது.

தீ விபத்து ஏற்பட்ட சமயத்தில் வீட்டிற்குள் பலர் இருந்தனர்.

நெருப்பை அவசரக்கால மீட்புக்குழுவினர் கட்டுப்பாட்டுக்குள் கொண்டு வந்த பிறகு, 38 வயதுடைய நபர் ஒருவர் வீட்டிற்குள் இறந்து கிடப்பது கண்டறியப்பட்டது.

44 மற்றும் 84 வயதுடைய இருவர், உயிருக்கு ஆபத்தான நிலையில் தீக்காயங்களுக்கு உள்ளாகி, சிகிச்சைக்காக ராயல் பிரிஸ்பேன் மற்றும் மகளிர் மருத்துவமனைக்கு (Royal Brisbane and Women’s Hospital) அவசரமாக அழைத்துச் செல்லப்பட்டனர்.

59 வயதுடைய பெண் ஒருவர், வீட்டிலிருந்து தப்பி ஓடும்போது உயிருக்கு ஆபத்தில்லாத காயங்களுடன் வைத்தியசாலைக்கு கொண்டு செல்லப்பட்டார்.

அதே 38 வயதுடைய மற்றொரு நபர் காயங்கள் ஏதுமின்றி தப்பியோடினார்.

அண்டை வீட்டாரான டேவிட் டா சில்வர் (David Da Silver) கூறுகையில், அதிகாலை 2 மணியளவில் வீட்டின் அருகே புகையையும் ஐந்து பொலிஸ் கார்களையும் பார்த்ததாகத் தெரிவித்தார்.