தென்கிழக்கு குயின்ஸ்லாந்தில்  2021-ஆம் ஆண்டு முதல், எட்டு பெண்களின்  பெயர், சமூக ஊடக விவரங்கள் மற்றும் பணிபுரியும் இடங்களின் விவரங்களுடன் அவர்களது உருவத்தை ஆபாசமாகச் சித்தரிக்கும் போலி AI (Deepfake) படங்கள் வெளியிடப்பட்ட வழக்கில், இதுவரை எட்டு பெண்கள் பாதிக்கப்பட்டவர்களாக அடையாளம் காணப்பட்டுள்ளனர்.

கடந்த மே 26 அன்று கேட்டன் (Gatton) பகுதியில் உள்ள ஒரு பொது இடம் உட்பட பல இடங்களில் ஒட்டப்பட்டிருந்த சுவரொட்டிகள் குறித்துத் தெரியவந்ததை அடுத்து, காவல் துறையினர் இந்த ஆண்டு விசாரணையைத் தொடங்கினர்.

பாதிக்கப்பட்ட பெண்களின் முகங்கள், ஆபாசமான பாலியல் செயல்களில் ஈடுபடும் பெண்களின் உடல்களுடன் செயற்கை நுண்ணறிவு (AI) மூலம் இணைக்கப்பட்டு (superimposed) அந்தச் சுவரொட்டிகளில் சித்தரிக்கப்பட்டிருந்ததாகக் காவல்துறை தெரிவித்துள்ளது.

மேலும், அந்தப் பெண்கள் பாலியல் தொழிலாளிகள் என்ற தவறான அடையாளத்துடன், அவர்களது முழு பெயர், சமூக ஊடகப் பயனர்பெயர்கள் மற்றும் பணி விவரங்களும் அதில் அச்சிடப்பட்டிருந்ததாகக் காவல்துறை குற்றம் சாட்டியுள்ளது.

விசாரணை அதிகாரிகள் இந்த வாரம் ஜூலை 22 அன்று, ரெட்லேண்ட் நகரத்தின் கிளீவ்லேண்ட் (Cleveland) பகுதியில் உள்ள ஒரு முகவரியில் சோதனை நடத்தினர்.
அங்கிருந்து பல மின்னணு சாதனங்கள், பிரிண்டர்கள் மற்றும் முன்னரே தயார் செய்யப்பட்ட AI போலி படங்களை அவர்கள் பறிமுதல் செய்தனர்.

மேலும், ஒரு மின்சாரக் கட்டுப்பாட்டு ஆயுதம் (Electronic control weapon), மூன்று துப்பாக்கிகள் (Longarm guns) மற்றும் 25 ரவுண்டுகள் வெடிமருந்துகளையும் காவல்துறை பறிமுதல் செய்தது.

இதனையடுத்து, கிளீவ்லேண்டைச் சேர்ந்த 52 வயதுடைய நபர் மீது, 27 நெருக்கமான படங்களை விநியோகித்த குற்றச்சாட்டுகள், பின்தொடர்ந்து தொல்லை கொடுத்தல் (stalking), ஆயுதக் குற்றங்கள் மற்றும் துன்புறுத்தல் குற்றச்சாட்டுகள் உட்பட 43 பிரிவுகளின் கீழ் வழக்குப்பதிவு செய்யப்பட்டுள்ளது.

அவர் காவலில் வைக்கப்பட்டுள்ளார், வரும் ஆகஸ்ட் 19 அன்று நீதிமன்றத்தில் ஆஜர்படுத்தப்படுவார்.

இதுவரை, துப்பறியும் அதிகாரிகள் பாதிக்கப்பட்ட எட்டு பெண்களை அடையாளம் கண்டுள்ளனர்.

இதுகுறித்து துப்பறியும் ஆய்வாளர் டிம் மார்ட்டின் கூறுகையில், அந்தப் பெண்கள் "மிகவும் மனவேதனை அளிக்கும் மற்றும் தனிப்பட்ட ரீதியிலான தாக்குதல்களுக்கு உள்ளாக்கப்பட்டுள்ளனர்" என்று தெரிவித்தார்.

"செயற்கை நுண்ணறிவு என்பது ஒரு புதிய தொழில்நுட்பமாகும், ஆனால் அதைப் பயன்படுத்தி அவதூறான அல்லது தரக்குறைவான பொருட்களை உருவாக்குவது மற்றும் பரப்புவது காவல்துறையின் பிடியிலிருந்து தப்பிக்க முடியாது," என்று அவர் கூறினார்.