சிட்னியின் தென்மேற்கு பகுதியில் உள்ள குடியிருப்பு ஒன்றில் ஏற்பட்ட பயங்கர தீவிபத்தைத் தொடர்ந்து, 16 வயது சிறுவன் உட்பட ஒரே குடும்பத்தைச் சேர்ந்த மூவர் உயிரிழந்த நிலையில் கண்டெடுக்கப்பட்டுள்ளனர்.
வைலி பார்க் (Wiley Park) பகுதியில் உள்ள கார்னேலியா தெருவில் (Cornelia Street) அமைந்துள்ள ஒரு சிறிய குடியிருப்பில் (Granny flat) நேற்று இரவு 9.30 மணிக்கு பிறகு இந்த தீவிபத்து ஏற்பட்டது.
தீயணைப்பு படையினர் சம்பவ இடத்திற்கு வந்தபோது, அந்த வீடு ஏற்கனவே தீப்பற்றி எரிந்து கொண்டிருந்தது.
அந்தச் சிறிய குடியிருப்பில் 52 வயதுடைய ஆண், 43 வயதுடைய பெண் மற்றும் 16 வயதுடைய சிறுவன் ஆகிய மூவர் வசித்து வந்ததாக காவல்துறையினர் தெரிவித்தனர்.
தீ மிகக் கடுமையாக எரிந்ததால், அதைக்கட்டுப்படுத்த 20 தீயணைப்பு வீரர்களும் 5 தீயணைப்பு வாகனங்களும் தேவைப்பட்டன. ஆரம்பத்தில் தீயணைப்பு படையினர் வீட்டிற்குள் நுழைவதற்கு மிகவும் சிரமப்பட்டனர்.
வியாழக்கிழமை காலை இது குறித்துப் பேசிய நியூ சவுத் வேல்ஸ் தீயணைப்பு மற்றும் மீட்புப் படை ஆணையர் (Jeremy Fewtrell), "தீ ஏற்கனவே மிகவும் தீவிரமாகப் பரவியிருந்தது; வீட்டிலிருந்து தீப்பிழம்புகள் வெளியே வந்துகொண்டிருந்தன," என்று கூறினார்.
மேலும், "வீட்டின் பக்கவாட்டுப் பகுதி மற்றும் தோட்டத்தின் முன்பகுதி வழியாக அவர்கள் உள்ளே நுழைய வேண்டியிருந்தது. அங்கு பல தடைகள் இருந்ததால் அது மிகவும் சவாலாக இருந்தது," என்றும் அவர் தெரிவித்தார்.
இந்தத் தீவிபத்து உள்ளூர் மக்களுக்கு ஒரு கொடூரமான சம்பவமாகும் எனக் குறிப்பிட்ட அவர், உயிரிழந்தவர்களின் குடும்பத்தினருக்குத் தனது இரங்கலைத் தெரிவித்துக் கொண்டார்.
சம்பவ இடத்தில் குற்றப் பிரிவு விசாரணைக் குழு அமைக்கப்பட்டு, தீ வைப்புப் பிரிவு (Arson squad) ஆய்வில் ஈடுபட்டு வருவதை காவல்துறையினர் உறுதிப்படுத்தினர். ஆனால், தீ வேண்டுமென்றே வைக்கப்பட்டது என்று இதற்குப் பொருளல்ல என்பதையும் அவர்கள் தெளிவுபடுத்தினர்.
