விக்டோரிய மாநிலத்தைச் சேர்ந்த ஆளும் லேபர் (Labor) கட்சியைச் சேர்ந்த இரண்டு மூத்த அமைச்சர்கள், வரவிருக்கும் நவம்பர் தேர்தலில் போட்டியிடப்போவதில்லை என்று அறிவித்துள்ளனர்.

ஜாசிந்தா அலனின் (Jacinta Allan) நெருங்கிய கூட்டாளியும், மூத்த அரச அமைச்சருமான ஹேரியட் ஷிங் (Harriet Shing) மற்றும் லிலி டிஅம்ப்ரோசியோ (Lily D'Ambrosio) ஆகிய இருவரும் வியாழக்கிழமை அரசியலில் இருந்து ஓய்வு பெறுவதாக அறிவித்ததுடன், தங்களது அமைச்சரவை பதவிகளில் இருந்தும் விலகியுள்ளனர்.

சுகாதாரத்துறை அமைச்சரான ஹேரியட் ஷிங், முதன்முதலில் 2014 ஆம் ஆண்டு தேர்ந்தெடுக்கப்பட்டார். இந்நிலையில், தாம் வரவிருக்கும் நவம்பர் தேர்தலில் மீண்டும் போட்டியிடப்போவதில்லை என்ற முடிவை புதிய பிரதமர் பென் கரோலிடம் (Ben Carroll) அவர் தெரிவித்துள்ளார்.

இது தொடர்பாக அவர் வெளியிட்டுள்ள அறிக்கையில், அரசாங்கத்தில் இருந்தபோது கட்சியின் சாதனைகள் குறித்துப் பெருமையடைவதாகவும், ஆனால் "இந்த வாய்ப்புகளையும் பொறுப்புகளையும் அடுத்த நபருக்கு வழங்க வேண்டிய" நேரம் இது என்றும் கூறியுள்ளார்.

மேலும், பிரதமராகப் பொறுப்பேற்றுள்ள பென் கரோலுக்கு வாழ்த்து தெரிவித்த ஷிங், "நவம்பரில் லிபரல் கட்சி மற்றும் ஒன் நேஷன் (One Nation) ஆகிய கட்சிகளுக்கு எதிராக நடைபெறவுள்ள மிக முக்கியமான தேர்தலில், அரசாங்கத்தை முன்னோக்கிப் கொண்டு செல்லும் அவருக்கு அமைச்சரவை, காக்கஸ் (Caucus) மற்றும் நமது முழு லேபர் இயக்கத்தின் முழு ஆதரவும், ஒற்றுமையும், மரியாதையும் கிடைக்கத் தகுதியுள்ளது" என்று குறிப்பிட்டார்.

மறுபுறம், லிலி டிஅம்ப்ரோசியோ வெளியிட்டுள்ள அறிக்கையில், மில் பார்க் (Mill Park) தொகுதியின் பிரதிநிதியாகத் தனது 24 ஆண்டுகால அரசியல் வாழ்க்கையையும், "ஆஸ்திரேலியாவின் நீண்டகால ஆற்றல் மற்றும் பருவநிலை அமைச்சராக" (Energy and Climate Minister) பணியாற்றிய நிலையைப் பற்றியும் நினைவு கூர்ந்துள்ளார். 

2014 இல் லேபர் கட்சி மீண்டும் ஆட்சிக்கு வந்தபோது புதுப்பிக்கத்தக்க ஆற்றலின் அளவு 11 சதவீதத்திற்கும் குறைவாகவே இருந்தது, ஆனால் தற்போது 45 சதவீத ஆற்றல் புதுப்பிக்கத்தக்க வளங்களில் இருந்து கிடைக்கிறது.

"விக்டோரியா எந்தப் பாதையில் சென்றதோ, நாட்டின் பிற பகுதிகளும் அதையே பின்பற்றியுள்ளன," என்று அவர் கூறினார். மேலும், பெண்கள் மற்றும் சிறுமிகள் அரசியலில் தங்களது கனவுகளைப் பின்பற்ற வேண்டும் என்றும் அவர் ஊக்குவித்தார்.

"எனது பொதுச் சேவை வாழ்க்கை, சிறுமிகளுக்கு அவர்களின் நம்பிக்கை, தோற்றம் அல்லது பேசும் விதம் எதுவாக இருந்தாலும் அவர்களால் என்ன சாதிக்க முடியும் என்பதைக் காட்டும் என்று நம்புகிறேன்," என்று அவர் கூறினார்.

தமது 24 ஆண்டுகாலப் பதவிக் காலத்தில் 20 ஆண்டுகள் அரசாங்கத்தில் அங்கமாக இருந்த டிஅம்ப்ரோசியோ, மில் பார்க் தொகுதியில் லேபர் கட்சியின் வேட்பாளராக உள்ளூர் பெண் ஒருவர் தனக்குப் பதிலாக நியமிக்கப்படுவார் என்று நம்புவதாகத் தெரிவித்தார்.

இவரது விலகல் மிகவும் முக்கியத்துவம் வாய்ந்ததாகும்.

2014 ஆம் ஆண்டின் டேனியல் ஆண்ட்ரூஸின் (Daniel Andrews) முதல் அமைச்சரவையில் இருந்து தற்போதும் பதவியில் இருக்கும் கடைசி அமைச்சர் இவர் மட்டுமே. அத்துடன் ஜாசிந்தா அலனுடன் சேர்த்து, பிராக்ஸ்-ப்ரம்பி (Bracks-Brumby) அரசாங்கத்தில் இருந்து தற்போது வரை இருக்கும் கடைசி லேபர் நாடாளுமன்ற உறுப்பினர்களில் இவரும் ஒருவர் என்பது குறிப்பிடத்தக்கது.